प्राथमिक तपासात समोर आले आहे की, आत्महत्या करण्यापूर्वी रिमीचे रोबिनसोबत व्हिडिओ कॉलवर प्रदीर्घ बोलणे झाले होते. त्यामुळे पोलीस आता या प्रकरणाचा तपास प्रेम प्रकरणाच्या बाजूने पुढे नेत आहेत. पोलीस सूत्रांनुसार, रिमीच्या मोबाईलच्या तपासणीतून अनेक महत्त्वाचे धागेदोरे हाती लागले असून, तिने शेवटचा व्हिडिओ कॉल रोबिनलाच केला होता आणि त्याला 'आय लव्ह यू' असा संदेशही पाठवला होता. मात्र, पोलीस प्रशासन अद्याप यावर अधिकृतपणे काहीही बोलण्यास टाळाटाळ करत आहे.

वडिलांना वेगळाच संशय

त्या शेवटच्या व्हिडिओ कॉल दरम्यान नक्की काय घडले, ज्यामुळे विद्यार्थिनीला इतके टोकाचे पाऊल उचलावे लागले, याचा शोध पोलीस घेत आहेत. दोन दिवसांपूर्वी इंजिनिअरिंग कॉलेजच्या हॉस्टेलमधील खोलीत इलेक्ट्रिकल अँड इलेक्ट्रॉनिक्स शाखेत शिकणाऱ्या रिमी कुमारीचा मृतदेह गळफास घेतलेल्या अवस्थेत आढळून आला होता. मृत रिमी ही मूळची मुझफ्फरपूर येथील लक्ष्मी चौकचे रहिवासी प्रदीप कुमार यांची मुलगी होती. घटनेची माहिती मिळताच मोतिहारी येथे पोहोचलेल्या तिच्या वडिलांनी स्पष्ट केले की, त्यांची मुलगी कोणत्याही मानसिक तणावाखाली नव्हती, तर एका नियोजित हत्येअंतर्गत तिची हत्या करण्यात आली आहे. दरम्यान, पोस्ट मार्टम अहवालात प्राथमिकदृष्ट्या मृत्यूचे कारण 'हँगिंग' म्हणजेच गळफास लागल्याने झाल्याचे सांगण्यात आले आहे.

हे ही वाचा : पोलिसाच्या पत्नीने बहिणीला मोबाईलचा पासवर्ड पाठवला, अन् पुढे सर्वांची झोप उडाली

SIT ची स्थापना

या संशयास्पद मृत्यूच्या घटनेनंतर मोतिहारी इंजिनिअरिंग कॉलेजच्या आवारात विद्यार्थ्यांनी सुरक्षा आणि निष्पक्ष तपासाच्या मागणीसाठी जोरदार गोंधळ घातला होता. प्रकरणाचे गांभीर्य लक्षात घेऊन पूर्व चंपारणचे पोलीस अधीक्षक (एसपी) स्वर्ण प्रभात यांनी तातडीने कारवाई करत एक विशेष तपास पथक (SIT) स्थापन केले आहे. या एसआयटीचे नेतृत्व सदर-2 चे उपविभागीय पोलीस अधिकारी (SDPO) जितेश कुमार पांडे यांच्याकडे सोपवण्यात आले आहे. मुफस्सिल पोलीस ठाण्याने कुटुंबीयांच्या तक्रारीवरून गुन्हा दाखल करून तपासाची चक्रे फिरवली आहेत. याच दरम्यान, विद्यार्थिनीच्या मृत्यूनंतर तिच्या मोबाईल फोनसोबत काही छेडछाड करण्यात आल्याची चर्चा कॉलेज आणि परिसरात रंगली आहे, परंतु पोलिसांनी अद्याप या वृत्ताला अधिकृत दुजोरा दिलेला नाही.

हे ही वाचा : नर्सचा मर्डर करुन बॉडी रुग्णालयात आणून टाकली, सुफियानच्या एका हट्टामुळे भयंकर घडलं!

विद्यार्थ्यांचेही जबाब नोंदवणार

पोलीस अधीक्षक स्वर्ण प्रभात यांनी सांगितले की, मोबाईलमधून मिळालेल्या पुराव्यांच्या आधारे तपास सुरू असून, सत्य शोधण्यासाठी महाविद्यालयातील इतर विद्यार्थ्यांचेही जबाब नोंदवले जातील. बुधवारी (20 मे) रात्री 10 वाजता तिने आपल्या कुटुंबीयांशीही अगदी सामान्यपणे संवाद साधला होता, मात्र गुरुवारी दुपारी दोन वाजता हॉस्टेलच्या खोलीतून तिचा मृतदेह जप्त करण्यात आला. यामुळे या संपूर्ण प्रकरणाभोवती संशयाचे अनेक मोठे प्रश्न निर्माण झाले आहेत.