बीडमध्ये मतदानाला हिंसक वळण, माजी आमदाराच्या घरासमोर दगडफेक; गाड्याही फोडल्या; मोठा राडा

घटनेदरम्यान आमदार विजयसिंह पंडित यांचे बंधू जयसिंह पंडित आणि माजी मंत्री बदामराव पंडित यांचे चिरंजीव विदोजित पंडित हेही आमने-सामने आल्याची माहिती स्थानिकांकडून मिळाली. या वादातून दोन्ही गटांमध्ये जोरदार दगडफेक झाली. रस्त्यावर उभ्या असलेल्या काही गाड्यांची तोडफोड करण्यात आली. वाहनांच्या काचा फोडण्यात आल्या असून जमाव आक्रमक झाल्याने परिस्थिती नियंत्रणाबाहेर जात असल्याचे चित्र काही काळ पाहायला मिळाले.

हेही वाचा : संतोष बांगरांनी सर्व नियम मोडले, मतदान केंद्रावर फोनवर गप्पा, बटण दाबण्यास सांगितलं अन् घोषणाबाजी VIDEO

घटनास्थळी तणाव वाढत असल्याची माहिती मिळताच गेवराई पोलिसांनी मोठ्या संख्येने पथक तैनात केले. दोन्ही गटांना पांगवण्यासाठी पोलिसांना हलका लाठीचार्ज करावा लागल्याची माहिती सूत्रांकडून मिळत आहे. पोलिसांच्या तत्पर हस्तक्षेपामुळे मोठी हानी टळली असली तरी सकाळपासूनच परिसरात प्रचंड दहशत पसरली आहे. मतदानावर या घटनेचा परिणाम होण्याची शक्यता पोलिसांनी नाकारलेली नाही.

दरम्यान, बीड शहरातही रात्रीपासूनच निवडणूक प्रक्रिया तापलेली दिसली. पेठ बीड भागातील सोनार गल्लीत दोन संशयित तरुणांना काही युवकांनी पकडले. हे तरुण दुचाकीवरून पैसे वाटत असल्याचा आरोप स्थानिकांनी केला. या संपूर्ण घटनेचे व्हिडिओ सोशल मीडियावर व्हायरल झाले असून स्कुटीच्या डिक्कीत काही पैसे आणि राष्ट्रवादी काँग्रेसचे घड्याळ चिन्ह असलेली पोस्टर्स दिसत असल्याचा दावा करण्यात येत आहे.

स्थानिकांनी पकडलेल्या दोन्ही तरुणांना पेठ बीड पोलिसांच्या ताब्यात देण्यात आले. मात्र, पेठ बीड पोलीस ठाण्याचे प्रमुख खेडकर यांनी फोनवर दिलेल्या माहितीनुसार, पोलिसांना कुठलीही रोकड सापडलेली नाही. रात्रीच्या गस्तीदरम्यान फक्त काही व्यक्तींकडून चाकू जप्त केल्याचे त्यांनी सांगितले. याउलट सोशल मीडियावर फिरणाऱ्या व्हिडिओमध्ये पाचशेच्या नोटा दिसत असल्याचे नागरिक सांगत आहेत. तसेच स्कुटीत चाकू असल्याचेही काहीजणांमध्ये बोलले जात आहे. बीड आणि गेवराई परिसरात सुरू असलेल्या या घटनांमुळे मतदानाच्या दिवशी निर्माण झालेला तणाव अधिक वाढला आहे. वातावरण अजूनही तापलेले असून पुढील कोणतेही अनर्थ टाळण्यासाठी पोलीस सतर्कतेने तैनात आहेत.

इतर महत्त्वाच्या बातम्या 

संतोष बांगरांनी सर्व नियम मोडले, मतदान केंद्रावर फोनवर गप्पा, बटण दाबण्यास सांगितलं अन् घोषणाबाजी VIDEO