IND vs ENG: टीम इंडियाने 13 वर्षांनंतर करून दाखवली कमाल, इंग्लंडला काही सुचेना...

भारतीय संघाने हा सामना 142 धावांनी जिंकला. यापूर्वी टीम इंडियाने मालिकेतील पहिला आणि दुसरा सामना 4 विकेट्सने जिंकला होता. अशाप्रकारे, त्यांनी 13 वर्षांनंतर द्विपक्षीय एकदिवसीय मालिकेत इंग्लंडला क्लीन स्वीप केले आहे.

हे ही वाचा>> Ind vs Eng : सचिन-विराटला जमलं नाही, ते गिलनं करून दाखवलं! 'हा' कारनामा करून रचला इतिहास

यापूर्वी ऑक्टोबर 2011 मध्ये भारतीय संघाने 5 सामन्यांच्या एकदिवसीय मालिकेत इंग्लंड संघाला 5-0 ने क्लीन स्वीप केलं होतं. त्यावेळी इंग्लंडचा संघ भारत दौऱ्यावर आला होता. यावेळीही असेच काहीसे घडले आहे. पण यावेळी मालिकेत फक्त 3 एकदिवसीय सामने होते.

इंग्लंडविरुद्ध भारताचा सर्वात मोठा एकदिवसीय विजय (धावांनी)

158 - राजकोट, 2008
142 - अहमदाबाद, 2025
133 - कार्डिफ, 2014
127 - कोची, 2013
126 - हैदराबाद, 2011

इंग्लंडचा संघ 214 धावांवर ऑलआउट

सामन्यात नाणेफेक गमावून प्रथम फलंदाजी केल्यानंतर भारतीय संघाने 357 धावांचे लक्ष्य ठेवले होते. प्रत्युत्तरात, संपूर्ण इंग्लंड संघ फक्त 34.2 षटकांत 214 धावांवर ऑलआउट झाला. अशाप्रकारे हा सामना त्यांनी 142 धावांनी गमावला. इंग्लंड संघाकडून अॅटकिन्सन आणि टॉम बँटन यांनी समान 38-38 धावा केल्या.

हे ही वाचा>> IND vs ENG: पदार्पण सामन्यातच वरुण चक्रवर्तीने रचला इतिहास! 'अशी' कामगिरी करणारा ठरला दुसरा भारतीय

बेन डकेटने 34, जो रूटने 24 आणि फिल सॉल्टने 23 धावा केल्या. भारतीय गोलंदाजांमध्ये अर्शदीप सिंग, हर्षित राणा, अक्षर पटेल आणि हार्दिक पंड्या यांनी प्रत्येकी 2-2 बळी घेतले. फिरकीपटू वॉशिंग्टन सुंदर आणि कुलदीप यादव यांनीही प्रत्येकी एक-एक बळी मिळवला.

शुभमनचे शतक, कोहली आणि श्रेयसचे अर्धशतक

तत्पूर्वी, नाणेफेक गमावून प्रथम फलंदाजी केल्यानंतर भारतीय संघाने 50 षटकांत 356 धावा केल्या. भारतीय संघाची सुरुवात चांगली झाली नाही. गेल्या सामन्यातील शतकवीर रोहित शर्मा दुसऱ्याच षटकात बाद झाला. वेगवान गोलंदाज मार्क वूडच्या गोलंदाजीवर रोहितला यष्टीरक्षक फिल साल्टने झेलबाद केले. रोहितने दोन चेंडूत फक्त 1 धाव काढली.

यानंतर शुभमन गिल आणि विराट कोहली यांनी जबाबदारी स्वीकारली. दोघांनी दुसऱ्या विकेटसाठी 116 धावांची भागीदारी केली. शुभमन गिलने 51 चेंडूत आपले अर्धशतक पूर्ण केले. तर कोहलीने 50 चेंडूत आपले अर्धशतक पूर्ण केले. कोहलीचे हे त्याच्या एकदिवसीय कारकिर्दीतील 73 वे अर्धशतक होते.

तथापि, विराट कोहली अर्धशतक झळकावल्यानंतर लगेचच पॅव्हेलियनमध्ये परतला. कोहलीला फिरकीपटू आदिल रशीदने झेलबाद केले. कोहलीने 55 चेंडूत 7 चौकार आणि एका षटकाराच्या मदतीने 52 धावा केल्या. कोहली बाद झाल्यानंतर, श्रेयस अय्यरने शुभमन गिलसह जबाबदारी स्वीकारली. शुभमनने 95 चेंडूत आपले शतक पूर्ण केले.

शुभमन गिलचे हे एकदिवसीय क्रिकेटमधील 7 वे शतक होते. याशिवाय त्याने कसोटी क्रिकेटमध्ये 5 शतके झळकावली आहेत. तर गिलने टी-20 आंतरराष्ट्रीय सामन्यातही शतक झळकावले आहे. अशाप्रकारे, या स्टार सलामीवीराने तिन्ही फॉरमॅटमध्ये शतक झळकावले आहे. शुभमनने शतक ठोकल्यानंतर, श्रेयस अय्यरनेही आपले अर्धशतक पूर्ण केले. श्रेयस आणि शुभमन यांनी तिसऱ्या विकेटसाठी 104 धावांची भागीदारी केली. शुभमन 102 चेंडूत 112 धावा करून बाद झाला. यादरम्यान त्याने 14 चौकार आणि तीन षटकार मारले. शुभमनला आदिल रशीदने बोल्ड केले. यानंतर रशीदने श्रेयस अय्यरलाही बाद केले. श्रेयसने 64 चेंडूत 8 चौकार आणि 2 षटकारांसह 78 धावा केल्या.

हार्दिक पंड्या (17) आणि अक्षर पटेल (13) धावा केल्या. तर केएल राहुलने 29 चेंडूत झटपट 40 धावा केल्या, ज्यात तीन चौकार आणि एक षटकार होता. 

भारतातील एकदिवसीय मालिकेत इंग्लंडची कामगिरी

एकूण एकदिवसीय मालिका: 11
भारताने आतापर्यंत 8 मालिका जिंकल्या आहेत
इंग्लंडने आतापर्यंत केवळ 1 मालिका जिंकली आहे
ड्रॉ: 2