Mumbai: आई मोबाईलवर खेळू देत नाही म्हणून १६ वर्षांच्या मुलाची आत्महत्या
मुंबईतल्या बोरीवली भागात एका १६ वर्षांच्या मुलाने आई मोबाईलवर खेळू देत नाही म्हणून आत्महत्या केल्याची घटना घडली. या प्रकरणी बोरीवली GRP पोलिसांनी तक्रार दाखल केली आहे.
दिंडोशी पोलिसांनी दिलेल्या माहितीनुसार ओम भारत नावाचा मुलगा मोबाइलवर गेम खेळत होता. बुधवारी संध्याकाळी ७ वाजता त्याच्या हातातून त्याच्या आईने त्याच्या हातून मोबाईल काढून घेतला. तसंच मोबाईलवर खेळू नकोस हे बजावलं.
यानंतर ओमने सुसाईड नोट लिहिली आणि तो घर सोडून निघून गेला. काही वेळानंतर त्याची आई घरी आली तेव्हा तिला ही चिठ्ठी सापडली. त्यात हे लिहिलं होतं की मी घर सोडून जातोय तसंच आता परत येणार नाही, मी आयुष्य संपवतो आहे असंही त्यात लिहिलं होतं.
ही चिठ्ठी पाहिल्यानंतर दिंडोशी पोलिसांनी ओमचा शोध घेण्यास सुरूवात केली. ओमने मालाड आणि कांदिवली स्टेशन्सच्या दरम्यान ट्रेनमधून उडी मारत आत्महत्या केली. त्याचा मृतदेह पोलिसांना मिळाला आहे. घटना घडल्यानंतर मालाड आणि कांदिवलीचे पोलीसही त्या जागी पोहचले होते. पोलीस या प्रकरणी पुढील तपास करत आहेत.
मोबाईलवर आई खेळू देत नाही म्हणून उत्तर प्रदेशातल्या लखनऊमधे मुलाने गोळी चालवत आईची हत्या केल्याची घटना बुधवारी उघडकीस आली होती. त्यानंतर मुंबईत ही घटना घडल्याचं समोर आलं आहे.
लखनऊमध्ये काय घडलं होतं?
आईने पबजी खेळण्यापासून थांबवल्याने एका १६ वर्षांच्या मुलाने आईवर गोळी झाडून तिला ठार केलं. या अल्पवयीन मुलाला पबजी खेळण्याची सवय लागली होती. आईने त्याला PUBG खेळ खेळण्यापासून रोखत असे. मात्र आता ही घटना समोर आली आहे. या घटनेत या मुलाने त्याच्या आईच्या डोक्यात गोळी झाडून तिची हत्या केली. त्यानंतर अंडा करी मागवत मित्रांसोबत पार्टीही केली.
उत्तर प्रदेशातल्या लखनऊमध्ये ही धक्कादायक घटना घडली आहे. उत्तर प्रदेश मधल्या लखनऊ शहरातल्या पीआयजी भागात हा १६ वर्षांचा अल्पवयीन मुलगा राहतो. त्याने आई पबजी (PUBG Game) खेळण्यापासून रोखते म्हणून तिला गोळी घालून ठार केलं. त्यानंतर मित्रांना बोलावलं ऑनलाईन अंडा करी मागवली आणि पार्टीही केली. मित्रांनी जेव्हा त्याला विचारलं की आई कुठे आहे? तर त्याने सांगितलं की ती काका-काकूंच्या घरी गेली आहे.
