Sonia Gandhi यांना कोरोना पाठोपाठ फंगल इनफेक्शन, डॉक्टरांच्या देखरेखीत उपचार सुरू

सोनिया गांधी यांच्यावर दिल्लीतल्या सर गंगाराम रूग्णालयात उपचार सुरू आहेत
Sonia Gandhi यांना कोरोना पाठोपाठ फंगल इनफेक्शन, डॉक्टरांच्या देखरेखीत उपचार सुरू
Congress president Sonia Gandhi faces fungal infection now (फाइल फोटो)

काँग्रेस अध्यक्षा सोनिया गांधी यांना कोरोना झाल्याची माहिती समोर आली होती. त्यापाठोपाठ आता त्यांना फंगल इनफेक्शनही झाल्याचं समोर आलं आहे. काँग्रेसचे नेते जयराम रमेश यांनी सोनिया गांधी यांच्या प्रकृतीविषयी माहिती दिली आहे. १२ जूनला सोनिया गांधी यांच्या नाकातून रक्त येऊ लागलं होतं. त्यांना दिल्लीतल्या सर गंगाराम रूग्णालयात दाखल करण्यात आलं. सोनिया गांधी या सध्या याच रूग्णालयात उपचार घेत आहेत.

Congress president Sonia Gandhi faces fungal infection now
सोनिया गांधी आणि राहुल गांधी यांच्या मागे का लागली ED? National Herald Case

सर गंगाराम रूग्णालयातील डॉक्टर सोनिया गांधी यांच्या प्रकृतीवर लक्ष ठेवून आहेत. तसंच त्यांच्यावर योग्य ते उपचारही करत आहेत. सोनिया गांधी यांना कोरोनाची लागण झाली होती. सोनिया गांधी यांना कोरोना झाल्याची माहिती त्यांनीच त्यांच्या ट्विटर अकाऊंटवरून दिली होती. तसंच त्यांच्या पाठोपाठ त्यांच्या कन्या प्रियंका गांधी यांनाही कोरोनाची लागण झाली. आता सोनिया गांधी यांना फंगल इनफेक्शन झाल्याची माहिती समोर आली आहे.

सोनिया गांधी यांना फंगल इनफेक्शन झाल्याने त्यांना श्वास घ्यायला त्रास होतो आहे. २ जूनला त्या कोरोना पॉझिटिव्ह झाल्या होत्या. या पाठोपाठ आता त्यांना फंगल इनफेक्शनचा त्रास सुरू झाला आहे. राहुल गांधी, सोनिया गांधी या दोघांनाही ED ने नोटीस बजावली होती.

सोनिया गांधी या प्रकृती चांगली नसल्याने चौकशीला हजर राहू शकल्या नाहीत. मात्र राहुल गांधी यांची ईडीने मागचे तीन दिवस चौकशी केली आहे. नॅशनल हेराल्ड प्रकरणात ही चौकशी सुरू आहे.

नॅशनल हेराल्डचं प्रकरण काय?

मार्च २००८ पर्यंत हे वृत्तपत्र सुरूवातीला देशातील स्वातंत्र्य लढ्याशी आणि त्यानंतर काँग्रेसशी संलग्न होते. १ एप्रिल २००८ मध्ये वृत्तपत्र बंद ठेवण्यात येत असल्याचं जाहीर करण्यात आलं. हे वृत्तपत्र बंद करण्याच्या आधी असोसिएटेड जर्नल्स लिमिटेड (AJL) कडून चालवलं जात होतं.

२००८ मध्ये तात्पुरत्या स्वरूपात बंद करण्यात आलेलं नॅशनल हेरॉल्ड वृत्तपत्र कायमचं बंद करण्याचा निर्णय सोनिया गांधी यांनी २००९ मध्ये घेतला.

पुढे भाजपचे नेते सुब्रह्मण्यम स्वामी यांनी काँग्रेस अध्यक्षा सोनिया गांधी, राहुल गांधी आणि त्यांच्या कंपन्यातील अन्य अधिकाऱ्यांच्या विरोधात न्यायालयात खटला दाखल केला. गांधी कुटुंबीयांकडून नॅशनल हेराल्डच्या (National Herald) संपत्तीत गैरव्यवहार करण्यात आल्याचा आरोप करण्यात आलेला आहे.

१९३८ मध्ये काँग्रेस पक्षाने असोसिएट जर्नल्स लिमिटेड म्हणजेच AJL ची स्थापना केली होती. या अंतर्गत नॅशनल हेराल्ड हे वृत्तपत्र काढण्यात आले. AJL वर ९० कोटींहून अधिक कर्ज होते. हे कर्ज फेडण्यासाठी आणखी एका कंपनीची स्थापना करण्यात आली. या कंपनीचं नाव होतं यंग इंडिया लिमिटेड (Young India Limited).

या कंपनीमध्ये राहुल गांधी आणि सोनिया गांधी यांची ३८-३८ टक्के भागीदारी होती. एजेएलचे ९ कोटी शेअर्स यंग इंडियाला देण्यात आले होते. या बदल्यात यंग इंडिया एजेएलचे याचं देणं लागणार होता. या प्रकरणात देशातील मोक्याच्या जागा कंपनीला अतिशय कमी किमतींमध्ये देण्यात आल्या, असे आरोप आहेत.

Related Stories

No stories found.
Mumbai Tak
www.mumbaitak.in