विजयानंतर चंद्रशेखर बावनकुळेंना आनंदाश्रू अनावर, फडणवीसांच्या गळ्यात पडत व्यक्त केल्या भावना

विधान परिषद निवडणुकीत नागपूरमध्ये चंद्रशेखर बावनकुळे यांचा विजय झाला आहे. 362 मतं मिळाली. डॉ. रविंद्र भोयर यांना 1, मंगेश देशमुखांना 186 अशी मतं मिळाली. 554 जणांनी मतं दिली होती. निवडणुकीसाठीचा कोटा 275 मतांचा होता. हा कोटा चंद्रशेखर बावनकुळे यांनी पहिल्याच फेरीत पूर्ण केला. या विजयानंतर चंद्रशेखर बावनकुळे आणि देवेंद्र फडणवीस हे जेव्हा लोकांसमोर आले तेव्हा बावनकुळे यांना अश्रू अनावर झाले. त्यांनी फडणवीसांच्या गळ्यात पडत आपल्या भावनांना वाट करून दिली.

बावनकुळेंचा विजय हा भविष्यातील विजयाची नांदी; फडणवीसांचा महाविकास आघाडीला दिला इशारा

विधान परिषद निवडणुकीच्या दोन जागांचे निकाल जाहीर झाल्यानंतर देवेंद्र फडणवीस यांनी माध्यमांशी संवाद साधला. यावेळी फडणवीस म्हणाले, “आज मला अतिशय आनंद होत आहे. माझे सहकारी चंद्रशेखर बावनकुळे यांना प्रचंड मोठा विजय मिळाला आहे. खरं म्हणजे मी स्वतः जेव्हा निवडून आलो, तेव्हा मला तितका आनंद झाला होता, त्यापेक्षाही जास्त आनंद मला आज चंद्रशेखर बावनकुळे यांच्या विजयामुळे झाला आहे. या विजयाने महाविकास आघाडीला चपराक दिली आहे”, असं फडणवीस म्हणाले.