महाराष्ट्राचे माजी गृहमंत्री अनिल देशमुखांविरोधात ED जारी करणार नवं समन्स

या पत्रामुळे खळबळ उडाली होती. या पत्रात अनिल देशमुख हे पोलिसांच्या बदल्यांमध्ये आणि पदोन्नतीमध्ये ढवळाढवळ करत आहेत असाही आरोप करण्यात आला होता. यानंतर भाजपने अनिल देशमुख यांच्या राजीनाम्याची मागणी केली होती. सुरूवातीला राष्ट्रवादी काँग्रेसचे अध्यक्ष शरद पवार यांनी या प्रकरणी दोन वेळेस पत्रकार परिषद घेतली आणि परमबीर सिंग यांनी केलेल्या आरोपांमध्ये तथ्य नसल्याने अनिल देशमुख यांनी राजीनामा देण्याचा प्रश्नच नाही असं म्हटलं होतं. मात्र परबमीर सिंग कोर्टात गेले. हे प्रकरण जेव्हा बॉम्बे हायकोर्टात गेलं तेव्हा कोर्टाने सीबीआय चौकशीचे आदेश दिले. ज्यानंतर अनिल देशमुख यांना त्यांचं पद सोडावं लागलं. सीबीआयने प्राथमिक चौकशी केली आणि FIR दाखल केली. त्यानंतर ED ने आक्रमक होत कारवाई सुरू केली आहे.

शुक्रवारी ED चे अधिकारी अनिल देशमुख यांच्या नागपूर आणि मुंबई येथील घरी पोहचले. अनिल देशमुख आणि त्यांचा एक मुलगा हे दोघेही मुंबईतल्या निवासस्थानी होते. ही कारवाई एका डेप्युटी कमिश्नर लेव्हलच्या अधिकाऱ्याचं स्टेटमेंट घेतल्यानंतर ईडीने केली. आता मुंबई पोलिसांच्या Enforcement wing चे इनचार्ज डीसीपी राजू भुजबळ हे आहेत. त्यांनी याआधी सामाजिक सेवा विभागही सांभाळला आहे त्यावेळी त्यांनी पब्स, हुक्का पार्लर्स, डान्स बार, बार आणि रेस्तराँ यांच्यावरही धाडी मारल्या आहेत. सूत्रांनी दिलेल्या माहितीनुसार आणखी काही पोलिसांचीही या प्रकरणी चौकशी होणार आहे.

सूत्रांनी दिलेल्या माहितीनुसार ईडीच्या अधिकाऱ्यांना सुमारे चार कोटी रूपये रक्कम जी साधारण 12 बार आणि रेस्तराँ मालक यांच्याकडून खंडणीच्या स्वरूपात घेण्यात आली होती त्याचा सुगावा लागला आहे. सचिन वाझेंनी ही रक्कम गोळा केली होती. हे पैसे महाराष्ट्राच्या बाहेर असलेल्या काही शेल कंपन्यांमार्फत अनिल देशमुख यांच्याकडे वळवण्यात आली. ही कंपनी अनिल देशमुख यांच्या जवळच्या नातेवाईकाची आहे असंही सूत्रांचं म्हणणं आहे.