माजी केंद्रीय मंत्री ऑस्कर फर्नांडीस यांचं निधन, मंगळुरुतील रुग्णालयात घेतला अखेरचा श्वास

८० वर्षीय ऑस्कर फर्नांडीस गेल्या काही महिन्यांपासून आजारी होते. योग अभ्यास करताना फर्नांडीस यांना जखम झाली होती ज्यानंतर त्यांची तब्येत बिघडली. मंगळुरुतील एका रुग्णालयात त्यांच्यावर उपचार सुरु होते. पंतप्रधान नरेंद्र मोदी यांनीही ऑस्कर फर्नांडीस यांच्या निधनावर शोक व्यक्त केला आहे.

Saddened by the demise of Rajya Sabha MP Shri Oscar Fernandes Ji. In this sad hour, my thoughts and prayers are with his family and well-wishers. May his soul rest in peace: PM @narendramodi

— PMO India (@PMOIndia) September 13, 2021

काँग्रेसच्या ज्येष्ठ आणि अनुभवी नेत्यांपैकी एक मानल्या जाणाऱ्या ऑस्कर फर्नांडीस हे सोनिया आणि राहुल गांधी यांच्या जवळचे नेते मानले जात होते. ऑस्कर फर्नांडीस सध्या राज्यसभेवर होते. युपीए सरकारच्या दोन्ही कार्यकाळात फर्नांडीस यांनी मंत्रीपद भूषवलं आहे.

१९८० साली कर्नाटकच्या उडप्पी लोकसभा मतदार संघातून फर्नांडीस पहिल्यांदा खासदार म्हणून निवडून आले. १९९६ पर्यंत फर्नांडीस या मतदार संघातून कायम जिंकत आले. १९९८ साली काँग्रेसने त्यांना राज्यसभेत पाठवलं. यानंतर आतापर्यंत फर्नांडीस राज्यसभेचे खासदार होते. २७ मार्च १९४१ रोजी त्यांचा जन्म झाला होता.