क्रांतिसिंह नाना पाटील यांच्या कन्या हौसाताई पाटील यांचं निधन

देशाला स्वातंत्र्य मिळाल्यानंतरही हौसा पाटील समाजातील वंचित घटकांना न्याय मिळावा यासाठी झटत राहिल्या. शेतकरी कामगार पक्षाच्या माध्यमातून हौसाताई पाटील काही काळ समाजकारण व राजकारणातही सहभाग घेतला. पुरोगामी चळवळीच्या आधारस्तंभ म्हणून हौसाताई पाटील यांची ओळख होती. सांगली जिल्ह्यातल्या हणमंतवडिये या गावी राहत होत्या.

ज्येष्ठ स्वातंत्र्यसेनानी हौसाक्का पाटील यांच्या निधनाने आधुनिक महाराष्ट्राच्या जडणघडणीतील क्रांतिकारक दुवा निखळला आहे. त्यांचे जीवन कित्येक पिढ्यांसाठी प्रेरणादायी ठरेल, अशा शब्दांत मुख्यमंत्री उद्धव बाळासाहेब ठाकरे यांनी वीरांगना हौसाक्का पाटील यांना श्रध्दांजली अर्पण केली आहे

— CMO Maharashtra (@CMOMaharashtra) September 23, 2021

क्रांतिसिंह नाना पाटील यांची कन्या तथा स्वातंत्र्यसेनानी आदरणीय हौसाक्का पाटील यांच्या निधनानं देशाच्या स्वातंत्र्यलढ्यात, गोवामुक्ती संग्रामात, संयुक्त महाराष्ट्राच्या आंदोलनात अतुलनीय साहस दाखवणारा महान क्रांतिवीर हरपला आहे. भावपूर्ण श्रद्धांजली! pic.twitter.com/xv57ieAIte

— Ajit Pawar (@AjitPawarSpeaks) September 23, 2021

इंग्रंजांविरुद्ध लढ्यातही हौसा पाटील होत्या आघाडीवर –

पत्री सरकारला आवश्यक असणारा शस्त्रपुरवठा करण्याचं काम तरुण काळात हौसाताई करत असत. इंग्रजांनी ठिकठिकाणी उभारलेले डाक बंगले जाळणं असो, रेल्वेचे रूळ उखाड्णं असो, फोनच्या तारा तोडणं असो वा इंग्रजांचा खजिना लुटणं असो, या सर्वच गोष्टीमध्ये हौसाताई आघाडीवर असायच्या. सुरलीच्या घाटात ब्रिटीशांच्या गाडीवरती छापा असो किंवा वांगी या ठिकाणचा ब्रिटिशांचा शस्त्रसाठा लुटण्यासाठी त्यांनी आपला जीव धोक्यात घातललेल्या घटना असो. भवानीनगर रेल्वे स्थानकावरती तर इंग्रजांचा शस्त्रसाठा लुटण्यासाठी वेषांतर करून हौसाताईंनी योजना आखली आणि ती योजना त्यांनी यशस्वी करून दाखविली होती.

क्रांतीसिंह नाना पाटलांची एकुलती एका मुलगी असलेल्या हौसाबाई 3 वर्षांच्या असतानाच त्यांच्यावरील आईचं छत्र हरवलं. स्वातंत्र्य लढ्यासाठी वडील भूमिगत राहत असल्यामुळे हौसाबाई अत्यंत खडतर परिस्थितीत जीवन जगावं लागलं. मात्र देशभक्तीचे बाळकडू त्यांना घरातूनच मिळालं. पुढे प्रतिसरकारच्या कामात त्यांनी स्वत:ला झोकून दिलं. इंग्रजांच्या नजरा चुकवून भूमिगत अ‍सलेल्या कार्यकर्त्यांना निरोप पोहोचवणे, त्यांच्या जेवणाची व्यवस्था करणे, पत्रीसरकारला लागणाऱ्या हत्यारांची ने-आण करणे, अशी कामं त्यांनी केली.

स्वत: क्रांतीसिंह नाना पाटलांनी हुंडा, मानपान, मंडप, वाजंत्री, जेवण, कोणताही धार्मिक विधी न करता हौसाबाईंचे लग्न स्वातंत्र्य चळवळीतील कार्यकर्ते भगवानराव मोरे पाटील यांच्याशी लावून दिलं. एकमेकांना हार घालून गांधी पद्धतीनं त्यांनी हे लग्न लावून दिलं. ही प्रथा पुढे अनेक कार्यकर्त्यांनीही सुरू ठेवली.