दक्षिण मुंबईतील पाच मजली इमारतीचा भाग कोसळला, ३५ जणांना बाहेर काढलं

अग्निशमन दलाने दिलेल्या माहितीनुसार या इमारतीचं दुरुस्तीचं काम सुरु होतं. ही इमारत जुनी असल्यामुळे आतल्या बाजुला डागडुजीचं काम सुरु होतं. याच भागाची पडझड झाल्याचं समोर येत आहे. सकाळी साडेसात वाजल्याच्या दरम्यान तिसऱ्या आणि चौथ्या मजल्य़ाचा स्लॅब कोसळला. पडझड सुरु होताच ३५ जणांना सुखरुप बाहेर काढलं आहे.

गेल्या काही दिवसांपासून मुंबईत पावसाचा जोर कमी असला तरीही धोकादायक इमारतींचा प्रश्न प्रामुख्याने समोर आला आहे. काही दिवसांपूर्वी मालाड येथील इमारत दुर्घटनेत काही जणांना आपले प्राण गमवावे लागले होते. ज्यानंतर मुंबई महापालिकेने शहरातील धोकादायक इमारतींना नोटीस पाठवली होती. सुदैवाने या प्रकरणात कोणतीही जिवीतहानी झालेली नाहीये.