सातारा : शिरवळमध्ये विद्यार्थ्यांना बेदम मारहाण; हॉस्टेलमध्ये घडली घटना

शिरवळ पोलीस एन. डी. महांगरे, बी.सी. दिघे, चालक धायगुडे व होमगार्ड नरुटे अशी निलंबित केलेल्या पोलिसांची नावे आहेत.

घडलेल्या घटनेबद्दलची माहिती अशी की, मारहाणीची घटना बुधवारी रात्री घडली आहे. विद्यार्थी आरडाओरडा करत असल्याची माहिती शिरवळ पोलिसांना मिळाल्यानंतर संबधित चौघे पोलीस विद्यार्थ्यांच्या हॉस्टेल वर गेले.

काहीही माहिती न घेता पोलिसांनी दिसेल, त्या विद्यार्थ्यांना झोडपण्यास सुरुवात केली. दरवाजे, कड्या तोडून रूममध्ये घुसून पोलिसांनी मारहाण केली. हा सर्व प्रकार तब्बल एक तास सुरू होता.

या घटनेचे तीव्र पडसाद उमटले आहेत. शनिवारी सकाळी विद्यार्थी संतप्त झाले. पोलिसांचा निषेध करत कॉलेजच्या गेट बाहेर आंदोलन सुरू केले. पोलिसांवर तत्काळ कारवाईची मागणी केली.

या आंदोलनाची तीव्रता वाढत गेली व राज्यात पाच ठिकाणी असलेल्या इतर पशु महावैद्यकिय कॉलेज मध्ये बंद पुकारण्यात आला. याचवेळी समाज माध्यमावर विद्यार्थ्यांना बेदम मारहाण केलेल्याचे फोटो व्हायरल झाले. घटनेचं गांभीर्य ओळखून पोलीस दलातील संबधित चौघांना निलंबित करण्यात आलं आहे.