देवाच्या चरणी तरी खरे बोला! शिवसेनेचा देवेंद्र फडणवीस यांना टोला

त्यांच्या याच वक्तव्याचा समाचार आता सामनाच्या अग्रलेखातून घेण्यात आला आहे. तसंच किमान देवाच्या चरणी तरी खरे बोला असं म्हणून त्यांना टोलाही लगावण्यात आला आहे. तसंच किरीट सोमय्यांचा उल्लेख भाजपचे युगपुरूष असाही करण्यात आला आहे.

‘मातोश्री’, डायरी अन् 2 कोटी रुपयांचं गिफ्ट.. पाहा फडणवीस काय म्हणाले!

काय म्हटलं आहे सामनाच्या अग्रलेखात?

भाजपने काय करावं किंवा काय करू नये? हा सर्वस्वी त्यांचा प्रश्न आहे. पण त्या मंडळींनी किमान महाराष्ट्राच्या प्रतिष्ठेशी खेळू नये. विरोधकांकडून रोजच नवनवीन पद्धतीने आरोप करून सरकारची प्रतिमा मलिन करण्याचे काम सुरू असल्याची खंत गृहमंत्री दिलीप वळसे पाटील यांनी व्यक्त केली आहे. महाराष्ट्रातील प्रत्येक मराठी माणसाची तीच खंत आहे. विरोधी पक्षाच्या बेबंद वृत्तीमुळे राज्य बदनाम व्हावे आणि त्या बदनामीचा आनंदोत्सव साजरा करावा हे चांगले नाही.

वळसे पाटील यांचे म्हणणे आहे की पेन ड्राईव्ह ही आता नवीन पद्धत निघाली आहे. खोटे आरोप करायचे, केंद्रीय तपास यंत्रणांची भीती दाखवायची, भ्रष्टाचाराचे आरोप करत संबंध नाही त्यांच्यांशी संबंध जोडायचे , एकीकडे कायदा सुव्यवस्था अडचणीत आहे असे म्हणायचे आणि दुसरीकडे छोट्या छोट्या गोष्टींवरून मोर्चे काढून तो प्रश्न निर्माण करायचा असे उपद्व्याप सुरू आहेत असंही वळसे पाटील यांनी म्हटलं आहे.

मुख्यमंत्र्यांजवळ जे टोमणे बॉम्ब आहेत त्याच्यापेक्षा खतरनाक बॉम्बच उरलेला नाही: फडणवीस

ज्यांच्या स्वतःवरच भ्रष्टाचाराचे, जमीन घोटाळ्याचे आरोप आहेत असे भाजपचे युगपुरूष किरीट सोमय्या हे हाती कागदी हातोडा घेऊन मुंबईतून भाडोत्री लोक नेऊन कोकणातील शांतता भंग करत आहेत. अशा मनोविकृतांच्या डोक्यावर कितीही हातोडे मारले तरीही त्यांचा मेंदू काही ठिकाणावर येत नाही. युगपुरूष सोमय्या अनधिकृत की काय ते रिसॉर्ट तोडायला निघाले यावर देवेंद्र फडणवीस काय बोलणार आहेत? काहीही बोला पण खरे बोला.

देवेंद्र फडणवीस हे शिर्डीत साईचरणी गेले, त्यानंतर म्हणाले की राजकारण गेलं चुलीत, मात्र इथलं गव्हर्नन्स ठीक राहिले पाहिजे त्याला बट्टा लागला आहे. ही अवस्था महाराष्ट्रात कधीही पाहिली नव्हती असे शहाणपणाचे उद्गार देवेंद्र फडणवीस यांनी काढले. पण महाराष्ट्राची इज्जत आणि गव्हर्नन्स चुलीत घालण्याचे काम देवेंद्र फडणवीस स्वतःच करत आहेत आणि त्या चुलीची शेकोटी घेत बसले आहेत. महाराष्ट्रातील विरोधी पक्षनेत्याचे गुड गव्हर्नन्स हे नक्कीच नाही. विरोधी पक्षातले फुटकळ लोक प्रशासनातील अधिकाऱ्यांवर खोटे आरोप करून त्यांची प्रतिमा मलीन करतात तेव्हा महाराष्ट्र चुलीत गेलेला चालतो का? शरद पवारांसारखा नेता पुण्यश्लोक अहिल्यादेवी होळकर यांच्या सांगलीतील स्मारकाच्या उद्घाटन सोहळ्यास जाण्याच्या आधी विरोधी पक्षनेत्यांचे पंटर्स कार्यक्रमात गोंधळ घालतात हा कसला गुड गव्हर्नन्स? असाही सवाल या अग्रलेखात विचारण्यात आला आहे.