तौकताई Cyclone : मुंबईच्या आकाशात ढगांची गर्दी, महाराष्ट्रावर काय होणार परीणाम?

महाराष्ट्रात 15 आणि 16 मे रोजी मुसळधार पाऊस ते अतिवृष्टीचा इशारा देण्यात आला आहे. या वादळाच्या पार्श्वभूमीवर ऑरेंज अलर्टही जारी करण्यात आला आहे. तौकताई चक्रीवादळ लक्षद्विप, केरळ, कर्नाटक किनारपट्टी आणि तामिळनाडूच्या काही भागांमध्येही अतिवृष्टी होते आहे. गुजरातच्या दिशेने हे वादळ 15 ते 17 मेच्या दरम्यान जातं आहे त्यामुळे कोकणातील प्रामुख्याने रत्नागिरी आणि सिंधुदुर्ग या जिल्ह्यात अतिवृष्टी आणि तीव्र वादळ असणार आहे. एवढंच नाही तर 15 आणि 16 मे या दोन दिवशी मुंबई, ठाणे, रायगड आणि पालघर या जिल्ह्यांमध्येही पावसाची शक्यता आहे. कोल्हापूर, सांगली, सातारा या जिल्ह्यांमध्येही वादळी वाऱ्यासह मुसळधार पावसाचा इशारा देण्यात आला आहे.

कोकण किनारपट्टीवर अलर्ट जारी

अरबी समुद्रात घोंघावणाऱ्या तौकताई वादळामुळे कोकण किरनापट्टीवर अलर्ट जारी करण्यात आला आहे. गोव्यात NDRF ची टीमही मदत आणि बचाव कार्यासाठी दाखल झाली आहे. या चक्रीवादळाची तीव्रता दुपारनंतर वाढणार आहे. कोकण किनारपट्टीवर अलर्ट जारी करण्यात आला आहे तर काही भागांमध्ये ऑरेंज अलर्टही देण्यात आला आहे.

चक्रीवादळ: महाराष्ट्राच्या दिशेने सरकतंय ‘टाँकटाई’ वादळ, किनारपट्टीला सतर्कतेचा इशारा

मुंबई, ठाणे, पालघर या जिल्ह्यांमध्ये पावसाच्या हलक्या सरी कोसळतील असा अंदाज जाहीर करण्यात आला होता. ज्यानुसार मुंबईत हलक्या सरी कोसळल्या आहेत. कोकणात मुसळधार पाऊस, वीजांच्या कडकडाटासह सोसाट्याचा वारा वाहणार आहे. रायगड जिल्ह्यात मोठ्या प्रमाणावर पाऊस पडेल. विदर्भातही मेघगर्जनेसह वीजांचा कडकडाट होईल असं हवामान खात्याने स्पष्ट केलं आहे.

16 मे म्हणजेच रविवारी महाराष्ट्र आणि गोव्याच्या किनारपट्टीच्या भागात वादळी वारे वाहतील आणि या भागातील मच्छीमारांना समुद्रात न जाण्याच्या सूचना देण्यात आल्या आहेत. तसेच जे मच्छीमार खोल समुद्रात आहेत त्यांनी लवकरात लवकर जवळच्या किनाऱ्यावर परण्याचा इशारा हवामान खात्याकडून देण्यात आला आहे.