कर्जमाफी होऊनही शेतकऱ्यांच्या आत्महत्या का थांबत नाहीत?

2021 या वर्षात औरंगाबाद विभागात 804 शेतकऱ्यांनी आत्महत्या केल्यात. नागपूर विभागात 309 शेतकऱ्यांनी मृत्यूला कवटाळलंय. अमरावती विभागातील 5 जिल्ह्यात मिळून 1153 शेतकऱ्यांनी आत्महत्या केल्या आहेत, तर यवतमाळमध्ये 299, बुलढाणा 285, अकोला 138 आणि वाशिममधील 75 शेतकऱ्यांनी आत्महत्या केल्या असल्याची माहिती समोर येत आहे.

नागपुरातल्या शेतकरी शाहाजी राऊत यांनीदेखील गतवर्षी आत्महत्या केली, यांची 10 एकर शेती होती. सावकाराकडून कर्ज घेतलं होतं. कर्जाची परतफेड करत नसल्याने सावकराकडून त्रास दिला जात होता, याच त्रासाला कंटाळून राऊत यांनी आत्महत्या केली.

पिकाची नासाडी होणे, अतिवृष्टी, वादळ, दुष्काळ अशा अनेक नैसर्गिक आपत्यांमुळे होत असलेलं नुकसान, याचमुळे बँकेचे कर्ज भरता न येणे, सावकाराकडून घेतलेल्या कर्जाची परतफेड न होणे हेच या शेतकऱ्यांचे आत्महत्या करण्याचं मुख्य कारण आहे. याच्यात अजून एक गोष्ट म्हणजे कर्जाची परतफेड न झाल्याने बहुतांश शेतकऱ्यांना डिफॉल्टर म्हणून घोषित केलं आणि अशा शेतकऱ्यांना बँकेकडून कर्ज मिळणे बंद झालं, त्यामुळे शेतकऱ्यांना खासगी सावकारांकडून कर्ज घ्यावं लागतं.