मुंबई-सोलापूर 'वंदे भारत' एक्सप्रेस धावणार! देवेंद्र फडणवीस यांची दिल्लीवारी यशस्वी

देवेंद्र फडणवीस यांनी राज्याला प्रकल्पांच्या रुपात दिवाळी भेट दिली.
Devendra Fadnavis
Devendra FadnavisMumbai Tak

नवी दिल्ली : आशियातील सर्वांत मोठ्या धारावी पुनर्विकास प्रकल्पासाठी रेल्वेची जागा मिळाली असून या पुनर्विकास प्रकल्पातील सर्व अडचणी दूर झाल्या आहेत, अशी माहिती उपमुख्यमंत्री देवेंद्र फडणवीस यांनी दिली. आज दिल्ली दौऱ्यावर असताना देवेंद्र फडणवीस आणि रेल्वेमंत्री अश्विनी वैष्णव यांच्या उपस्थितीत रेल्वे मंत्रालयाच्या रेल लँड डेव्हलपमेंट अ‍ॅथॉरिटी आणि धारावी पुनर्विकास प्रकल्प प्राधीकरण यांच्यात या प्रकल्पाच्या ‘डेफिनेटिव्ह अ‍ॅग्रीमेंट’वर स्वाक्षरी करण्यात आली, त्यानंतर ते बोलत होते.

समृद्धी महामार्गाला जोडून हायस्पीड रेल्वे आणि हायस्पीड कार्गो रेल्वे :

यावेळी बोलताना फडणवीस यांनी इतरही काही प्रकल्पांची भेट राज्याला मिळाली असल्याचं सांगितलं. ते म्हणाले, मुंबई-नागपूर समृद्धी महामार्गाला जोडून हायस्पीड रेल्वे आणि हायस्पीड कार्गो रेल्वे सुरू करण्याच्या प्रस्तावावर सुद्धा अश्विनी वैष्णव यांच्याशी चर्चा झाली. याबाबत सकारात्मक विचार करण्याचे आश्वासन त्यांनी दिले असल्याची माहिती फडणवीस यांनी दिली.

मुंबई ते सोलापूर मार्गावर ‘वंदे भारत’ रेल्वे :

खासदार जयसिद्धेश्वर स्वामी महाराज आणि खासदार रणजितसिंग नाईक निंबाळकर यांनी मुंबई ते सोलापूर मार्गावर ‘वंदे भारत’ रेल्वेसंदर्भात विनंती केली होती. त्यानुसार या प्रकल्पाबाबतही चर्चा झाली असून लवकरच याबाबत सकारात्मक विचार करुन कार्यवाही करण्याचे आश्वासन अश्विनी वैष्णव यांनी दिले असल्याची माहिती फडणवीस यांनी दिली. तसेच नाशिक-पुणे हायस्पीड रेल्वे प्रकल्पाबाबत आढावा घेताना आणि पुढील चर्चा करताना याबाबत ‘रेल कम रोड’ प्रकल्पाचा विचार व्हावा, असा एक प्रवाह पुढे आला. त्याबाबत मुख्यमंत्री एकनाथ शिंदे यांच्याशी चर्चा करुन राज्य सरकार पुढील निर्णय घेईल, असे त्यांनी सांगितले.

नागपूर रेल्वेस्थानकाच्या पुनर्विकासासाठी 487 कोटी

देवेंद्र फडणवीस यांनी यावेळी नागपूर रेल्वे स्थानकाच्या पुनर्विकासासाठी कार्यादेश मिळाला असल्याची माहिती दिली. ते म्हणाले, नागपूर रेल्वे स्थानकाचा पुनर्विकास आणि आधुनिकीकरण यासाठीचा 487 कोटी रुपयांचा कार्यादेश जारी करण्यात आला आहे. या कार्यादेशाची प्रत रेल्वेमंत्र्यांनी आज दिली.

यामुळे नागपूर रेल्वेस्थानकावर अनेक चांगल्या प्रवासी सुविधा उपलब्ध होणार असून, प्रवाशांना जागतिक दर्जाच्या सोयी मिळणार आहेत. याभागातील सामाजिक-आर्थिक विकासाला सुद्धा यामुळे चालना मिळेल. या प्रकल्पासाठी केंद्रीय मंत्री नितीन गडकरी आणि आम्ही सातत्याने पाठपुरावा करीत होतो. हा कार्यादेश जारी केल्याबद्दल पंतप्रधान नरेंद्र मोदी आणि रेल्वेमंत्री अश्विनी वैष्णव यांचा मी आभारी आहे. प्रत्येक नागपूरकराच्या वतीने मी त्यांचे आभार मानतो.

एअर इंडियाची इमारत राज्याला

देवेंद्र फडणवीस यांनी आज केंद्रीय विमान वाहतूक मंत्री ज्योतिरादित्य शिंदे यांचीही भेट घेतली. यावेळी मुंबईतील एअर इंडियाची इमारत राज्य सरकारला देण्याची विनंती त्यांनी केली. सध्या मंत्रालय आणि अ‍ॅनेक्स इमारत मिळून सुद्धा शासकीय कार्यालयांसाठी जागा अपुरी पडत आहे. त्यामुळे या इमारतीची मागणी करण्यात आली, असे त्यांनी सांगितले.

मुख्यमंत्री असताना हा प्रस्ताव आम्ही दिला होता. मात्र दरम्यानच्या काळात तो प्रस्ताव मागे पडला. त्यानंतर आम्ही पुन्हा पत्रव्यवहार केला. सध्या रिझर्व्ह बँक आणि महाराष्ट्र सरकार अशा दोघांनी या जागेची मागणी केली आहे. पण केंद्रीय मंत्र्यांनी महाराष्ट्र सरकारला प्राधान्य देण्याची मागणी मान्य केली आहे. आता केंद्र सरकारचे अधिकारी आणि आमचे मुख्य सचिव यासंदर्भात पुढील चर्चा करतील आणि मुख्यमंत्री एकनाथ शिंदे यांच्या मान्यतेने पुढील निर्णय घेण्यात येईल, असेही देवेंद्र फडणवीस यांनी सांगितले.

Related Stories

No stories found.
Mumbai Tak
www.mumbaitak.in