सोमय्यांच्या प्रयत्नांना यश : किशोरी पेडणेकरांवर मोठी कारवाई; एसआरएचे बीएमसीला आदेश

पेडणेकर यांच्याकडील ४ सदनिका ताब्यात घेण्याचे आदेश झोपडपट्टी पुनर्वसन प्राधिकरण अर्थात एसआरएने मुंबई महानगरपालिकेला दिले आहेत. तहसिलदार उमेश पाटील यांनी हे आदेश काढले आहेत. एसआरएने या प्रकरणाची चौकशी केल्यानंतर सामान्य नागरिकांच्या सदनिका किशोरी पेडणेकर यांनी हस्तांतरीत केल्याचे समोर आले आहे. हे प्रकरण दाबण्याचा प्रयत्न तत्कालिन मुख्यमंत्री उद्धव ठाकरे यांनी केला होता असा आरोप देखील सोमय्या यांनी केला होता.

सोमय्या यांनी काय आरोप केले होते?

किरीट सोमय्या यांनी पत्रकार परिषद घेऊन किशोरी पेडणेकरांविरुद्ध गंभीर आरोप केले होते. ते म्हणाले होते, “किशोरी पेडणेकर यांनी गरीब झोपडपट्टीवासीयांचे एसआरएचे गाळे हडप केले. इतकंच नाही, तर बोगस बनावट कागदपत्रांच्या आधारे गोमाता जनता एसआरएचे गाळे स्वतःच्या किश कॉर्पोरेट सर्व्हिसेस इंडिया प्रा. लि. कंपनीच्या नावे करण्याचा गुन्हा केला आहे”.

पेडणेकर यांनी गोमाता जनता एसआरएमधील चार सदनिका अनधिकृतरित्या बळकावल्याचा आरोप सोमय्या यांनी केला होता. याबाबत त्यांनी उपमुख्यमंत्री देवेंद्र फडणवीस यांच्याकडेही तक्रार दाखल केली होती. तसंच या सदनिका महानगरपालिकेने ताब्यात घ्याव्यात अशी मागणी त्यांनी केली होती. सोमय्याांच्या तक्रारीची दखल घेत आता एसआरएने या सदनिका ताब्यात घेण्याचे आदेश दिले आहेत.

यावेळी किरीट सोमय्या यांनी किशोरी पेडणेकर, त्यांची कंपनी किश कॉर्पोरेट सर्व्हिसेस इंडिया प्रा. लि. आणि एसआरएचे गाळा/सदनिका धारक संजय महादेव अंधारी यांच्यात झालेल्या लिव्ह अॅण्ड लायसन्सच्या कराराची प्रतीही पत्रकार परिषदेत दाखवल्या होत्या.

किरीट सोमय्या म्हणाले होते, “कराराप्रमाणे संजय महादेव अंधारी ज्यांना एसआरए योजनेतंर्गत गोमाता जनता एसआरए सोसायटीतील बिल्डिंग क्रमांक १ मधील ४ नंबरच्या मजल्यावर गाळा देण्यात आला होता. संजय अंधारी हे अनेक वर्षांपासून झोपडपट्टीत राहतात, असं दाखवण्यात आलं होतं.”

“एसआरएने जी कागदपत्रे दिली आहेत, त्यात संजय अंधारी यांचा फोटो आणि स्वाक्षरी आहे. ६ जुलै २०१७ रोजी संजय अंधारी यांनी ही जागा किशोरी पेडणेकर यांच्या किश कॉर्पोरेट सर्व्हिसेस इंडिया प्रा.लि. कपंनीला दिली. त्याचं करारपत्र सरकारकडे आहे”, अशी माहिती किरीट सोमय्यांनी पत्रकार परिषदेत दिली होती.

किशोरी पेडणेकरांनी स्वतःच्या भावाच्या नावाने फेरफार केला – किरीट सोमय्या

पुढे बोलताना सोमय्या म्हणाले होते, “किशोरी पेडणेकर स्वतःच्या भावाच्या नावाने अशा प्रकारे फेरफार करू शकतात ही धक्कादायक बाब आहे. संजय महादेव अंधारींच्या नावाने किश कॉर्पोरेट सर्व्हिसेस इंडिया प्रा. लि. कंपनीसोबत जो करार झाला आहे, त्यात संजय अंधारी यांची सही किशोरी पेडणेकरांचे एकेकाळचे भाऊ सुनील कदम यांनी केली आहे, असं दिसतं”, असा आरोप सोमय्यांनी केला होता.

किशोरी पेडणेकरांनी बेनामी पद्धतीने गाळे हडप केले – किरीट सोमय्यांचा आरोप

“करारामध्ये संजय महादेव अंधारीचा जो फोटो दाखवण्यात आलाय आहे, तो फोटोही सुनील कदम यांचा आहे. सुनील कदम हे किशोरी पेडणेकरांचे भाऊ आहेत, असे माजी महापौरांनी अनेकवेळा सांगितलंय. सुनील कदम संजय अंधारी बनून हा केला म्हणजे किशोरी पेडणेकर यांनी एसआरएचे गाळे बेनामी पद्धतीने हडप केले हे सिद्ध होत आहे”, असा दावा किरीट सोमय्या यांनी किशोरी पेडणेकरांवर आरोप करताना केला होता.