MOTN: आज जर निवडणुका झाल्या तर काय आहे महाराष्ट्राचा मूड, महायुतीसाठी धोक्याची घंटा?

मूड ऑफ द नेशन सर्व्हेत जो अंदाज वर्तवण्यात आला आहे त्यामध्ये अंशत: फायदा हा महायुतीला होताना दिसतोय. पण विधानसभा निवडणुकीचा विचार केल्यास जर अशाच पद्धतीचा कल राहिल्यास महायुतीची डोकेदुखी वाढू शकते. हा सर्व्हे 15 जुलै ते 10 ऑगस्ट या काळात करण्यात आला होता. ज्याचा सॅम्पल साइज हा 1 लाख 36 हजार 463 एवढा आहे.

मूड ऑफ द नेशन: लोकसभेसाठी व्होट शेअर कसा बदलत गेला 

लोकसभा निवडणुकीत महाराष्ट्राने अत्यंत महत्त्वाची भूमिका बजावली होती. भाजपने 400 पारचा नारा दिला होता. मात्र, या निवडणुकीत महाराष्ट्राने महायुतीऐवजी महाविकास आघाडीच्या पारड्यात वजन टाकलं होतं. आता तीन महिन्यानंतरही परिस्थिती फारशी बदलेली नाही. किंबहुना जर आता निवडणुका झाल्या तर भाजप प्रणित महायुतीला अधिक मोठा फटका बसू शकतो. कारण लोकसभा निवडणुकीत महाराष्ट्रात महायुतीच्या मतांची टक्केवारी ही 43.55 टक्के होती. पण आज घडीला जर मतदान झालं तर महायुतीच्या टक्केवारी साधारण दीड टक्क्याने घसरण होत असल्याचं दिसतं आहे. 

दुसरीकडे महाविकास आघाडीला फायदा होत असल्याचं दिसतं आहे. एप्रिल-मे महिन्यात पार पडलेल्या लोकसभा निवडणुकीत महाविकास आघाडीच्या मतांची टक्केवारी ही 43.71 टक्के एवढी होती. पण जर आज घडीला महाराष्ट्रात लोकसभेची निवडणूक झाली तर महाविकास आघाडीच्या मतांची टक्केवारी वाढून 44 टक्के एवढी होत असल्याचं सर्व्हेत पाहायला मिळत आहे.

आज लोकसभा झाल्यास महाराष्ट्रात कोणाला किती जागा मिळू शकतात? 

जर आज महाराष्ट्रात लोकसभा निवडणुका झाल्या तर पुन्हा एकदा त्यात महाविकास आघाडीचीच सरशी होत असल्याचं दिसून येत आहे. ज्यामध्ये सर्वाधिक फायदा हा काँग्रेसचा होऊ शकतो. कारण त्यांच्या जागांमध्ये वाढ होऊ शकते. तर दुसरीकडे भाजपच्या जागा देखील वाढत असल्याचं सर्व्हेमध्ये दिसतंय. 

दुसरीकडे राज्यातील चारही प्रादेशिक पक्षांना मात्र काही प्रमाणात फटका बसत असल्याचं दिसतं आहे. पण असं असलं तरी आज जरी निवडणुका झाल्या तर महाविकास आघाडीचीच राज्यात सरशी होत असल्याचं दिसून येत आहे.

सर्व्हेनुसार राज्यात आज लोकसभेच्या निवडणुका झाल्या तर सर्वाधिक जागा या काँग्रेसला मिळू शकतात. त्यांना राज्यात एकूण 16 जागा मिळतील. तर भाजपला 12 जागा मिळतील. तर शिवसेना (UBT) आणि राष्ट्रवादी काँग्रेस (शरद पवार) हे दोन्ही पक्ष 14 जागा जिंकू शकतात.

तर महायुतीतील शिवसेना (शिंदे गट) आणि राष्ट्रवादी काँग्रेस (अजित पवार) या दोन्ही पक्षांना मिळून अवघ्या 6 जागांवरच विजय मिळू शकतो. असा अंदाज सर्व्हेत वर्तवण्यात आला आहे.