IPL 2022 : धोनीच्या खेळीने चाहते खुश! मुंबईच्या पहिल्या विजयी स्वप्नावर फेरलं पाणी

मुंबई इंडियन्सच्या पराभवाची मालिका सुरुच, यंदाच्या हंगामातला सलग सातवा पराभव
IPL 2022 : धोनीच्या खेळीने चाहते खुश! मुंबईच्या पहिल्या विजयी स्वप्नावर फेरलं पाणी
फोटो सौजन्य - BCCI

महेंद्रसिंह धोनीने अखेरपर्यंत मैदानात तळ ठोकून लढवलेली खिंड आणि त्याला इतर फलंदाजांनी दिलेली साथ या जोरावर चेन्नई सुपरकिंग्जने आयपीएलच्या पंधराव्या हंगामात आपला कट्टर प्रतिस्पर्धी मुंबई इंडियन्सला पराभूत केलं आहे. ३ विकेटने सामना जिंकत चेन्नईने आपला दुसरा विजय नोंदवला. मुंबईलाही या सामन्यात विजयाची संधी चालून आली होती. परंतू जयदेव उनाडकटच्या अखेरच्या ओव्हरमध्ये फटकेबाजी करत मुंबईच्या स्वप्नांवर पाणी फिरवलं.

टॉस जिंकून पहिल्यांदा बॉलिंगचा निर्णय घेतलेल्या चेन्नई सुपरकिंग्जने चांगली सुरुवात केली. युवा मुकेश चौधरीने रोहित शर्मा आणि इशान किशन यांना शून्यावर माघारी धाडत मुंबईला मोठे धक्के दिले. या दोन धक्क्यांमधून मुंबई सावरते न सावरते तोच डेवाल्ड ब्रेविसही मोठा फटका खेळण्याच्या प्रयत्नात मुकेश चौधरीच्या बॉलिंगवर आपली विकेट फेकून बसला. यानंतर सूर्यकुमार आणि तिलक वर्माने मुंबईच्या डावाला आकार दिला.

३ बाद २३ अशा खडतर परिस्थितीत अडकलेल्या मुंबईला सूर्यकुमार आणि तिलक वर्माने सावरलं. विशेषकरुन सूर्यकुमारने आक्रमक पवित्रा घेत काही चांगले फटके खेळत मुंबईवरचं दडपण कमी केलं. ही जोडी मैदानावर जम बसवतेय असं वाटत असतानाच मिचेल सँटनरने सूर्यकुमारला माघारी धाडलं. सूर्यकुमारने २१ बॉलमध्ये ३ फोर आणि १ सिक्स लगावत ३२ धावा केल्या. सूर्यकुमार माघारी परतल्यानंतर तिलक वर्माने सूत्र हातात घेत फटकेबाजीला सुरुवात केली.

अखेरच्या फळीतल्या हृतिक शोकीन, कायरन पोलार्ड आणि जयदेव उनाडक यांना साथीला घेत तिलक वर्माने आपलं अर्धशतक पूर्ण करत संघाला १५५ धावांचा टप्पा गाठून दिला. तिलक वर्माने ४३ बॉलमध्ये ३ फोर आणि २ सिक्स लगावत ५१ धावा केल्या. चेन्नईकडून मुकेश चौधरीने ३, ड्वेन ब्राव्होने २ तर सँटनर आणि तीक्षणाने १-१ विकेट घेतली.

प्रत्युत्तरादाखल चेन्नईच्या संघाची सुरुवातही निराशाजनक झाली. डॅनिअल सम्सने ऋतुराज गायकवाड आणि मिचेल सँटनरला झटपट माघारी धाडलं. २ बाद १६ अशा खडतर अवस्थेत अडकलेल्या चेन्नईला रॉबिन उथप्पा आणि अंबाती रायुडूने सावरलं. दोघांमध्येही तिसऱ्या विकेटसाठी ५० धावांची भागीदारी झाल्यानंतर जयदेव उनाडकटने रॉबिन उथप्पाला माघारी धाडत चेन्नईची जमलेली जोडी फोडली.

यानंतर मुंबईच्या बॉलर्सनी चांगला मारा करत ठराविक अंतराने चेन्नईच्या फलंदाजांना माघारी पाठवण्याचा धडाका सुरुच ठेवला. अंबाती रायुडू, शिवम दुबे आणि रविंद्र जाडेजा हे फलंदाज बाद झाल्यामुळे अखेरच्या ओव्हर्समध्ये चेन्नईवरचं दडपण वाढलं. परंतू महेंद्रसिंह धोनी आणि प्रेटोरियसने मोक्याच्या ओव्हर्समध्ये पुन्हा एकदा फटकेबाजी करुन संघाचं आव्हान कायम ठेवलं. जयदेव उनाडकटने अखेरच्या ओव्हरमध्ये प्रिटोरियसला आऊट करत सामन्यात रंगत आणली. परंतू धोनीने जयदेवच्या बॉलिंगवर हल्लाबोल करत चेन्नईच्या विजयावर शिक्कामोर्तब केलं.

Related Stories

No stories found.