Shiv Sena : गोविंदा शिवसेनेत! शिंदेंना 'या' जागेसाठी उमेदवार सापडला? 

मला मिळालेली जबाबदारी योग्य रीतीने पार पाडेल, असे गोविंदा यावेळी म्हणाला. तर एकनाथ शिंदे यांनी गोविंदाचे शिवसेनेत स्वागत केले. यावेळी शिंदे म्हणाले की, "गोविंदाजी मला म्हणाले की, मुंबई बदलतेय. त्यांना विकास हवा आहे. मोदींच्या नेतृत्वाखाली जे काम सुरू आहे, ते पाहून ते शिवसेनेमध्ये आले आहेत."

"मुंबईतील फिल्म इंडस्ट्रीसाठी त्यांना काम करायचं आहे. त्यांनी मला सांगितलं आहे की, त्यांच्या कुठल्याही अटी शर्थी नाहीत. त्यांनी मला सांगितलं की, वनवास होता. तो संपला आहे. आता राम मंदिरही बनलं आहे. आता सगळीकडे गोविंदा... गोविंदा आहे", असे एकनाथ शिंदे यावेळी म्हणाले. 

त्यांना तिकीट नकोय - शिंदे

गोविंदाला उमेदवारी देणार आहे का? असा प्रश्न ज्यावेळी विचारण्यात आला. त्यावर शिंदे म्हणाले की, "त्यांनी कोणतीही अट ठेवलेली नाही. त्यांना तिकीट नको आहे. त्यांना बळजबरी तिकीट देणार का? त्यांना फक्त फिल्म इंडस्ट्रीसाठी काम करायचे आहे", असे सांगत शिंदेंनी थेट उत्तर देणे टाळले.