धक्कादायक… लग्नाच्या रिसेप्शनमध्ये नाचता-नाचता तरुणाचा मृत्यू

नाचताना तरुणाचा मृत्यू

हे प्रकरण मध्य प्रदेशच्या जामुन धाना गावातील आहे. जिथे लग्नाच्या स्वागत समारंभात नाचणाऱ्या अंतलाल उईके या 32 वर्षीय तरुणाचा मृत्यू झाला. अंतलाल हा डोरी गावचा रहिवासी असून त्याचा नातेवाईक सोनू कुमरे याच्या लग्नात जामुन धाना गावात आला होता. शुक्रवारी लग्न होतं आणि शनिवारी रिसेप्शन. दरम्यान रिसेप्शनवेळी डीजेवर तो बेधुंद होऊन नाचत होता. काही वेळाने तो नाचताना खाली पडला.

घटनास्थळी उपस्थित लोकांना सुरुवातीला वाटलं की, अंतलाल हा डान्स करताना मजा मस्ती करत आहे. त्यामुळे अनेक जण मोबाइलवर त्याचा व्हीडिओ शूट करत बसले. तो खाली पडला तरीही लोक त्याचा व्हीडिओच शूट करत होते. पण बराच वेळ त्याच अवस्थेत असल्याचं दिसल्यानंतर लोकांना त्याला उचलण्याचा प्रयत्न केला. मात्र तोपर्यंत त्या तरुणाचा मृत्यू झाला होता.

मिळालेल्या माहितीनुसार, पोलिसांनी मृतदेह ताब्यात घेऊन शवविच्छेदनासाठी पाठवला आहे. त्याचा अहवाल आल्यानंतरच अंतलालच्या मृत्यूचे नेमके कारण समजणार आहे. अंतलाल हा तीन बहिणींना एकुलता एक भाऊ असल्याचे सांगण्यात येत आहे. त्याला एक 5 वर्षांची मुलगीही आहे.

या घटनेनंतर लग्नाच्या आनंदाच्या वातावरणावर दु:खाची झालर पसरली आहे. मृतांच्या नातेवाइकांची अवस्था तर अत्यंत वाईट झाली आहे. सगळ्यांनाच अंतलालच्या मृत्यूचं नेमकं कारण जाणून घ्यायचं आहे. यासाठी सर्वजण शवविच्छेदन रिपोर्टची वाट पाहत आहेत. पोलीसही या प्रकरणाचा सध्या गांभीर्याने तपास करत आहेत.