कोरोना नाही पण भुकेमुळे नक्कीच जीव जाईल ! विडी कामगार महिलांना लॉकडाउनचा फटका

सध्या सोलापुरातील विडी कामगार महिलांना तंबाखू आणि विडी बनवण्यासाठी लागणारं पान मिळत नाहीये. सर्व कारखाने बंद असल्यामुळे या महिलांची अडचण झाली आहे, त्यामुळे कारखाने लवकरात लवकर सुरु करण्याची मागणी महिलांनी केली आहे. या कच्च्या मालाच्या कमतरतेमुळे अनेक महिलांचं काम बंद झालं असून याचा फटका संपूर्ण कुटुंबाला बसत आहे. सोलापूर शहरातील वाढत्या रुग्णसंख्येची साखळी मोडण्यासाठी लॉकडाउनची घोषणा करण्यात आली. शहरातली लोकं वर्क फ्रॉम होम करु शकतात…पण आमच्या घरातून काम करण्यालाही मर्यादा येत असल्यामुळे घर कसं चालवायचं असा प्रश्न पडत असल्याची भावना या महिलांनी बोलून दाखवली.

सोलापूर शहरात विडी उद्योग मोठ्या प्रमाणात चालतो. विडी उद्योगावर सोलापुरातील सुमारे ३० ते ४० हजार महिलांचं घर चालतं. फार पूर्वीपासून विडी उद्योग हा वर्क फ्रॉम होम सुरु आहे. विडी तयार करण्यासाठी लागणाचा कच्चा माल या महिलांना कारखान्यातून मिळतो….परंतू लॉकडाउनमुळे हाच कच्चा माल मिळत नसल्यामुळे अनेक महिलांचं काम सुटलं आहे. विडी वळणाऱ्या महिलांना दररोज १५० ते १८० रुपयांची बिदागी मिळते. परंतू लॉकडाउनमध्ये कच्चा माल मिळत नसल्यामुळे या हक्काच्या कमाईवरही या महिलांना पाणी सोडावं लागत आहे. त्यामुळे शहरातील कारखाने लवकरात लवकर उघडून आमचं कुटुंब वाचवा अशी मागणी या महिलांनी केली आहे.