सचिन वाझेंविरोधात आमच्याकडे सबळ पुरावे – ATS ची माहिती

बनावट आधारकार्ड दाखवून मुंबईतील फाईव्ह स्टार हॉटेलमध्ये राहत होते सचिन वाझे!

“मनसुख हिरेन प्रकरणात महाराष्ट्र एटीएस पथकाने गुन्ह्याची नोंद केल्यानंतर दुसऱ्या दिवशी सचिन वाझे यांची चौकशी केली. या चौकशीत सचिन वाझे यांनी आपल्यावरील सर्व आरोप फेटाळले. स्कॉर्पिओ गाडी आपल्या ताब्यात कधीच नव्हती आणि मनसुख हिरेन यांना ओळखत नसल्याचं सचिन वाझेंनी सांगितलं. हिरेन यांच्या मृत्यूत आपला सहभाग नसल्याचंही वाझेंनी एटीएसला दिलेल्या जबाबात स्पष्ट केलं. परंतू एटीएसच्या तपास अधिकाऱ्यांनी सचिन वाझेंचा दावा खोटा ठरवत पुरावे गोळा केले असून वाझेंचा या गुन्ह्यात नेमका काय तपास सुरु होता याची चौकशी सुरु आहे.”

प्राथमिक चौकशीत मिळालेल्या माहितीच्या आधारावर एटीएसच्या अधिकाऱ्यांनी गुन्ह्यात वापरलेल्या सिमकार्डचा शोध लावला. हे सिमकार्ड मुंबईमध्ये पत्त्याचा क्लब व बेटींग घेणाऱ्या व्यक्तीने सचिन वाझेंच्या सांगण्यावरुन गुजरातवरुन प्राप्त केली अशी महत्वाची माहिती एटीएसने दिली. ही सिमकार्ड गुजरातमधील एका कंपनीच्या नावे खरेदी करण्यात आल्याचंही तपासात निष्पन्न झालंय. ही सिमकार्ड सचिन वाझेंच्या सांगण्यावरुन ATS च्या अटकेत असलेल्या नरेश गोर या आरोपीने दुसरा आरोपी विनायक शिंदे याला दिली. पॅरोलवर असणारे मुंबई पोलिसांचे माजी कर्मचारी विनायक शिंदे यांनी रजेवर असताना हा अपराध केला, त्यांनी मृतक हिरेन यांच्याशी संपर्क साधून त्यांना बोलावून घेतलं होतं. या हत्येत विनायक शिंदे यांचा प्रत्यक्ष सहभाग असल्याचे पुरावे प्राप्त झाले असून ATS ने आरोपींना सोबत घेऊन मुंब्रा येथे मनसुख हिरेन यांची बॉडी सापडली त्या ठिकाणी क्राईम रिक्रिएशनही करून घेतलं आहे.