मेडिकलमधून कंडोम आणण्यास ‘नकार’; अल्पवयीन मुलाच्या गळ्यावर ‘वार’

या प्रकरणी चंदननगर पोलिसांनी निलेश वाघमारे (वय 21 रा. थिटे वस्ती, खराडी) याच्यावर खुनाचा प्रयत्न केल्याचा गुन्हा दाखल केला आहे. याबाबत तुकारामनगर येथील एका 17 वर्षाच्या मुलाने फिर्याद दिली आहे.

फिर्यादी अल्पवयीन मुलगा हा त्याच्या मित्राला भेटण्यासाठी 3 ऑगस्ट रोजी थिटेवस्ती परिसरात गेला होता. त्यावेळी निलेश याने अल्पवयीन मुलाला पैसे देऊन मेडिकलमधून कंडोम घेऊन येण्यास सांगितले. मात्र मुलाने त्याला नकार दिला. त्यामुळे निलेश याने चिडून मुलाला शिवीगाळ करत हाताने मारहाण करण्यास सुरूवात केली. ‘माझे काम तू ऐकत नाही काय थांब आता तुला जिवंत सोडत नाही’ असे म्हणत तेथे असलेल्या वडापावच्या दुकानामधील चाकू घेऊन येऊन मुलाच्या गळ्यावर वार करून जखमी केले. त्यानंतर आरोपी निलेश हा तिथून पळून गेला.

या अल्पवयीन मुलाला तिथल्या नागरिकांनी तातडीने रूग्णालयात नेलं आणि पोलिसांना या घटनेची माहिती दिली. त्यानंतर पोलिसांनी घटनास्थळी धाव घेतली. या घटनेता हा अल्पवयीन मुलगा गंभीर जखमी झाला आहे. पोलीस आता निलेश वाघमारेचा शोध घेत आहेत. या प्रकरणी वरिष्ठ पोलीस निरीक्षक सुनील जाधव पुढील तपास करत आहेत.