राज ठाकरेंच्या भाषणाचं राणेंकडून कौतुक, टीका करणाऱ्या नेत्यांनाही सुनावलं

राज ठाकरेंनी आपल्या भाषणात महाविकास आघाडी सरकारच्या कारभाराचा पंचनामा केला. महाराष्ट्रातलं वास्तववादी चित्र त्यांनी सांगितलं जे काही जणांना झोंबलं. ज्यांनी आयुष्यभर स्वार्थीपणाने आणि सोयीने सत्ता मिळवली त्यांनी राज ठाकरेंच्या भाषणावर प्रतिक्रीया द्यावी हे ही आश्चर्य आहे, असं राणे म्हणाले.

गुढी पाडव्याच्या मुहूर्तावर श्रीयुत राज ठाकरे यांनी महाराष्ट्रातील आघाडी सरकारचा पंचनामा केला. महाराष्ट्रातील वास्तववादी चित्र त्यांनी सांगितले, हे काही जणांना झोंबले आणि त्यांनी प्रतिक्रिया दिल्या.

— Narayan Rane (@MeNarayanRane) April 3, 2022

ज्यांनी आयुष्यभर स्वार्थी, सोयीने सत्ता मिळवली त्यांनी राज ठाकरे यांच्या भाषणावर प्रतिक्रिया द्यावी, हे ही एक आश्चर्य आहे. २०१९च्या निवडणुकीनंतर शिवसेनेने भाजपशी गद्दारी केली त्याहीपेक्षा मोठी गद्दारी हिंदुत्वाशी आहे.

— Narayan Rane (@MeNarayanRane) April 3, 2022

पदासाठी, पैशासाठी गद्दारी करणाऱ्यांनी राज ठाकरेंना कितीही उत्तर दिले असले, तरी 'गद्दारी ती गद्दारीच'. हे निष्ठेचे राजकारण नाही, हे पद आणि सत्तेसाठीचे राजकारण आहे.

— Narayan Rane (@MeNarayanRane) April 3, 2022

दुसरीकडे भाजपचे राज्यसभेचे खासदार विनय सहस्रबुद्धे यांनीही राज ठाकरेंच्या भूमिकेचं समर्थन केलं आहे. राज ठाकरेंची भूमिका हिंदुत्वासाठी अनुकूल राहिली आहे. त्यांनी जर हिंदुत्वावर भर दिला असेल ते हिंदुत्वाच्या भल्यासाठीच असल्याचं सहस्रबुद्धे म्हणाले. राज ठाकरेंनी मशिदीवरील भोंग्याबद्दल घेतलेल्या भूमिकेवर बोलताना सहस्रबुद्धे म्हणाले, “खऱ्या अर्थाने सलोखा आणि सामंजस्य नांदायचे असेल तर कोणालाही विशेष अधिकार देता कमा नयेत. या अर्थाने राज ठाकरेंच्या भूमिकेचं स्वागत झालं पाहिजे.”

फायरब्रँड नेते ‘पुष्पा’तले फ्लॉवर का झाले? मनसेची साथ सोडलेल्या रुपाली पाटलांची टीका

भविष्यात मनसे आणि भाजप एकत्र येणार का या प्रश्नाला उत्तर देताना सहस्रबुद्धेंनी सावध प्रतिक्रीया दिली. राज ठाकरे राजकीय नेते आहेत, ते एका राजकीय पक्षाचे प्रमुख आहेत. ते त्यांचा मार्ग निवडतील. अटकळबाजीच्या माध्यमातून पतंग उडवण्यात काहीच अर्थ नसल्याचं सहस्रबुद्धे म्हणाले.

मशिदीवरील भोंग्याचं राजकारण : राज ठाकरेंच्या भूमिकेला सुजात आंबेडकरांचा पाठींबा, पण…