Nashik Oxygen Leak : प्रकरणी झाकीर हुसैन रूग्णालयाचं CCTV फुटेज आलं समोर

काय आहे सीसीटीव्ही फुटेजमध्ये?

21 एप्रिलच्या दुपारी सव्वाबाराच्या सुमारास ऑक्सिजनची गळती झाली. टँकरमधून ऑक्सिजन भरला जात असताना एकाएकी गळती झाल्याचं समोर आलं होतं. या प्रकरणाच्या चौकशीसाठी विभागीय आयुक्त राधाकृष्ण गमे यांच्या अध्यक्षतेखाली चौकशी समिती स्थापन करण्यात आली आहे. ही समिती 15 दिवसात अहवाल सादर करणार आहे.

काय घडली घटना?

बुधवारी दुपारी 1 वाजण्याच्या सुमारास नाशिकच्या झाकीर हुसैन रूग्णालयात ऑक्सिजन लीक झाल्याची माहिती समोर आली. या दुर्घटनेत सुरूवातीला 10 जणांचा मृत्यू झाल्याचं समोर आलं होतं. मात्र त्यानंतर या दुर्घटनेत 22 जणांचा मृत्यू झाल्याची माहिती समोर आली. या घटनेबाबत मुख्यमंत्री उद्धव ठाकरे यांनीही अतीव दुःख व्यक्त केलं आहे. . राज्यभरात एकीकडे ऑक्सिजनचा प्रचंड तुटवडा जाणवतो आहे. अशात नाशिकच्या झाकीर हुसैन रूग्णालयात ऑक्सिजनची गळती झाली. ऑक्सिजन टँकरमध्ये गळती झाल्याने तो रूग्णालय परिसरात सगळीकडे पसरला. या गळतीनंतर ऑक्सिजन पुरवठा तब्बल अर्धा ते पाऊण तास खंडीत झाला होता. जो नंतर पूर्ववत करण्यात आला.

सात सदस्यीय चौकशी समिती करणार घटनेची चौकशी

नाशिकमध्ये घडलेली घटना अत्यंत दुर्दैवी आहे. या प्रकरणाच्या चौकशीसाठी सात सदस्यीय समिती नेमण्यात आली असून विभागीय आयुक्त राधाकृष्ण गमे यांच्या अध्यक्षतेखाली ही समिती चौकशी करणार आहे. या समितीमध्ये वैद्यकीय अधिकारी, तांत्रिक दोष निर्माण झाल्याने तंत्रनिकेतन महाविद्यालयाचे प्राचार्य, महापालिकेचे अभियंता आणि ऑक्सिजन प्लांट उभारणीचं काम करणाऱ्या लोकांचा समावेश असेल असंही राजेश टोपे यांनी स्पष्ट केलं.