उस्मानाबाद जिल्ह्यात कडक निर्बंध लागू, तुळजाभवानी मंदीरही १२ तासांसाठीच सुरु

उस्मानाबाद जिल्ह्यातील कोरोनाग्रस्त रुग्णांची वाढती संख्या लक्षात घेता जिल्हाधिकारी कौस्तुभ दिवेगावकर यांनी कडक निर्बंध लादण्याचा निर्णय घेतला असून सार्वजनिक ठिकाणी ५ पेक्षा जास्त लोकांनी गर्दी केली तर त्यांना १ हजार रुपयांचा दंड ठोठवण्यात येणार आहे. दरम्यान उस्मानाबाद जिल्ह्यातील तुळजाभवानी मंदिरासह सर्व धार्मिक स्थळ दर रविवारी बंद राहणार असून इतर दिवसांत सकाळी ७ ते संध्याकाळी ७ अशा बारा तासांमध्ये भाविकांसाठी खुली राहणार आहेत. याचसोबत गर्दीवर नियंत्रण मिळवण्यासाठी आता तुळजाभवानी मंदिरात फक्त ५ हजार भाविकांनाच दर्शनाची परवानगी मिळणार असल्याचं जिल्हाधिकारी कार्यालयाने स्पष्ट केलंय. मास्क घालून न येणाऱ्या भाविकांना मंदिराच्या आवारात प्रवेशच दिला जाणार नाहीये. त्यामुळे जिल्ह्यातील वाढती रुग्णसंख्या पाहता भाविकांनी ऑनलाईन दर्शनाचा लाभ घ्यावा असं आवाहन दिवेगावकर यांनी केलंय.