भाजपची चुकीची कृती अन् घटनेची पायमल्ली, ‘सर्वोच्च’ निकालानंतर जयंत पाटलांची टीका

शिंदे सरकार वाचलं हा सत्तेच्या भोवती गोळा झालेल्यांसाठी क्षणिक आनंद राहू शकतो. कसे बसे शिंदे सरकार वाचले ही आनंदाची भावना त्यांची राहू शकते. पण हे सर्व अवैध, घटनाबाह्य आहे. यातून भाजपने महाराष्ट्रात केलेली कृती कशी चुकीची आहे. तसेच घटेनेची पायमल्ली कशाप्रकारे झाली हे राज्यातील जनतेला सुप्रीम कोर्टाने सांगितले,असे जयंत पाटील म्हणाले.तसेच राज्यातील सर्व राजकीय परिस्थिती पाहून उद्धव ठाकरे यांनी राजीनामा दिला नसता तर महाविकास आघाडीला पुन्हा सत्तेत बसण्याची संधी मिळाली असती असे कोर्टाने सांगितले. यातून सुप्रीम कोर्टाच्या मनात काय होते हे स्पष्ट झाले आहे.

भरत गोगावले यांचा व्हीप अमान्य केला असल्याने विधानसभेतील शिवसेनेच्या सदस्यांनी जी कृती केली ती अवैध ठरणार आहे. त्यामुळे विधानसभेच्या अध्यक्षांना निर्णय घेताना सुप्रीम कोर्टाने ज्या मुद्यांची नोंद केली त्या चौकटीत राहून काम करावे लागेल असे ते म्हणाले. यामध्ये विधानसभा अध्यक्ष वेळकाढूपणाचे धोरण करू शकणार नाही, असे जयंत पाटील म्हणाले आहेत.

राज्यपालांना जसा माणूस भेटेला तसे ते मार्गदर्शन करत गेले. राज्यपालांना योग्य संधी मिळाली तेव्हा कायद्याची पायमल्ली करून आमचं सरकार घालवण्यासाठी राज्यपाल महोदयांनी फार मोठा हातभार लावला असा थेट आरोप जयंत पाटील यांनी भगतसिंह यांच्यावर केला आहे.