कार्यकर्ते धाय मोकलून रडले ,अजितदादांना अखेरचा निरोप देताना लाखोंचा जनसागर हळहळला

मागील अनेक वर्षांपासून आपल्या ठाम नेतृत्वशैलीने आणि वेगवान कामकाजामुळे महाराष्ट्राच्या राजकारणात केंद्रस्थानी राहिलेले उपमुख्यमंत्री अजित पवार यांचे बुधवारी बारामती येथे झालेल्या अपघातात निधन झाले.

 जिल्हा परिषद निवडणुकीच्या प्रचारासाठी आयोजित सभांसाठी अजित पवार काल बारामतीत येणार होते.
 

 मात्र, बारामती विमानतळावर उतरत असताना त्यांच्या विमानाचा भीषण अपघात झाला. धावपट्टीवर लँडिंगदरम्यान विमान कोसळून मोठा स्फोट झाला. या दुर्घटनेत अजित पवार यांच्यासह विमानातील एकूण सहा जणांचा जागीच मृत्यू झाला.
 

अजित पवार यांच्या अकाली जाण्याने राज्याच्या राजकारणाला जबर धक्का बसला असून, संपूर्ण महाराष्ट्रात शोककळा पसरली आहे. 
 

त्यांच्या निधनामुळे महाराष्ट्राने एक प्रभावी नेतृत्व गमावल्याची भावना व्यक्त होत आहे. 
 

अजित पवार यांच्यावर गुरुवारी बारामतीतील विद्या प्रतिष्ठानच्या मैदानात अंत्यसंस्कार करण्यात येत आहेत. 
 

या अंत्यदर्शनासाठी राज्यासह देशभरातील अनेक प्रमुख नेते बारामतीत दाखल झाले.
 

अजित पवार यांचे निधन शरद पवार यांच्यासाठी मोठा वैयक्तिक धक्का मानला जात असून, त्यांचा खंबीर आधार हरपल्याची भावना व्यक्त केली जात आहे. 
 

या कठीण प्रसंगी त्यांना धीर देण्यासाठी सर्वपक्षीय नेते बारामतीत उपस्थित राहत आहेत.