आतली बातमी: सोलापुरात राऊतांच्या वाटेत जुने काटे, इतिहास होणार रिपीट?

राजेंद्र राऊतांसमोरची 4 मोठी आव्हाने

1. धैर्यशील मोहिते-पाटील घटक

या निवडणुकीत लढत राऊत-देशमुख यांच्यात असली तरी प्रत्यक्षात ही प्रतिष्ठेची लढाई पालकमंत्री जयकुमार गोरे आणि खासदार धैर्यशील मोहिते-पाटील यांच्यात मानली जात आहे. जिल्ह्यातील अनेक स्थानिक प्रतिनिधी मोहिते-पाटील यांच्या प्रभावाखाली असल्याने मतदानात क्रॉस व्होटिंग किंवा निष्क्रियता झाली तर त्याचा परिणाम भाजपला भोगावा लागू शकतो.

2. भाजपमधील अंतर्गत अस्वस्थता

सोलापूरच्या राजकारणात काही स्थानिक नेते आणि गट पालकमंत्री जयकुमार गोरे यांच्या वाढत्या हस्तक्षेपाबद्दल नाराज असल्याची चर्चा आहे. काही नगरसेवक, पंचायत सदस्य किंवा स्थानिक पदाधिकारी मतदानाच्या वेळी पूर्ण ताकदीने सक्रिय राहिले नाहीत तर राऊत यांची मतांची आघाडी कमी होऊ शकते.

3. विरोधकांचा "प्रतिष्ठेची निवडणूक" प्रचार

महाविकास आघाडी आणि शरद पवार गट ही निवडणूक केवळ एक जागा नसून भाजपच्या वर्चस्वाविरोधातील लढाई म्हणून मांडत आहेत. त्यामुळे विरोधक प्रत्येक मतदारापर्यंत पोहोचून भाजपविरोधी मतांचे एकत्रीकरण करण्याचा प्रयत्न करत आहेत.

4. स्थानिक स्वराज्य संस्थांमधील नाराजी

स्थानिक स्वराज्य संस्था मतदारसंघात मतदान करणारे मतदार हे सर्वसामान्य नागरिक नसून नगरसेवक, जिल्हा परिषद सदस्य, पंचायत समिती सदस्य आणि इतर लोकप्रतिनिधी असतात. विकासकामे, निधी वाटप, स्थानिक गटबाजी आणि पक्षांतर यामुळे काही ठिकाणी नाराजी असल्यास त्याचा फटका थेट उमेदवाराला बसू शकतो. अशा निवडणुकांमध्ये अनेकदा अपेक्षित नसलेले मतदानाचे पॅटर्न दिसतात.