प्रजासत्ताक दिनाच्या निमित्ताने धनंजय मुंडे बीड व शिरुर कासार तालुक्यांच्या दौऱ्यावर होते. यावेळी समर्थकांकडून त्यांचं जंगी स्वागत करण्यात आलं. यावेळी धनंजय मुंडे यांच्या जेसीबीने पुष्पवृष्टी करुन त्यांचे स्वागत करण्यात आले. मुंडे समर्थकांचा जल्लोष यावेळी बघायला मिळाला.
राष्ट्रवादी काँग्रेसचे नेते आणि राज्याचे सामाजिक न्याय मंत्री धनंजय मुंडे यांच्यावर रेणू शर्मा नावाच्या महिलेने बलात्काराचा आरोप केला होता. त्यानंतर राज्यभर खळबळ माजली होती. विरोधकांनी मुंडेंवर टीका केली होती. परंतु, काही दिवसानंतर त्या महिलेने आपली तक्रार मागे घेतली आणि धनंजय मुंडेना दिलासा मिळाला.
रेणू शर्मा प्रकरणावर धनंजय मुंडे यांनी मौन बाळगले होते पण बीड दौऱ्यावर धनंजय मुंडे काय बोलणार, याची सर्वजण प्रतिक्षा करत होते. अखेर आज धनंजय मुंडे यांनी मौन सोडले आणि प्रसारमाध्यमांशी संवाद साधला.
प्रसार माध्यमाशी संवाद साधताना धनंजय मुंडे म्हणाले की, “देवाचा प्रसाद असतो, तसे तुमचे आशीर्वाद माझ्या पाठीशी आहेत. अशा कठीण प्रसंगामध्ये तुम्ही सर्वांनी माझ्या पाठीशी उभे राहून दिलेल्या साथीबद्दल मी शब्दात आभार मानू शकत नाही. आपल्या उपकाराची परतफेड माझ्या अंगावरील कातड्याची जोडे करून जरी आपल्याला घातली तरीही ती फिटू शकत नाही. आजपर्यंत मी अनेक संकटांना सामोरे गेलो आहे. सामान्य माणसाच्या मनामध्ये स्थान निर्माण करून आज इथपर्यंत पोहोचलो आहे’, अशी प्रतिक्रिया मुंडेंनी लोणी येथे दिली.
