अनिल देशमुखांची लवकरच जेलमध्ये रवानगी, घोटाळ्याचा पैसा स्वतःच्या कंपन्यांमध्ये वळवला – किरीट सोमय्यांचा आरोप

अनिल देशमुखांनी घोटाळ्याचा पैसा हा कोलकात्यामधील बोगस कंपन्यांद्वारे आपल्या परिवाराच्या नावावर असलेल्या लोकांकडे वळवल्याचा आरोप सोमय्या यांनी केला आहे. याच प्रकरणात छगन भुजबळ ३ वर्ष जेलमध्ये होते, आता अनिल देशमुख आणि अनिल परबांची अवस्थाही अशीच होणार असल्याचं कळतंय.

अनिल देशमुखचा घरी आज ED ई डी चे छापे काही दिवसांनी जेल मधे रवानगी होणार. घोटाळ्याचा पैसा कोलकत्ता कंपन्या द्वारा स्वतःचा कंपन्या मधे वळविला. छगन भुजबळ अशाच प्रकारचा घोटाळ्या मुळे ३ वर्ष जेल मधे होते.

काही दिवसांनी अनिल परबची अशीच अवस्था होणार @BJP4Maharashtra @Dev_Fadnavis

— Kirit Somaiya (@KiritSomaiya) June 25, 2021

सकाळी ८ वाजल्यापासून ईडीचं ६-७ जणांचं पथक देशमुखांच्या घरी चौकशी करत आहे. या कारवाईदरम्यान अनिल देशमुख घरी नसल्याचं कळतंय. परमबीर सिंग यांनी पत्राद्वारे अनिल देशमुख यांनी सचिन वाझेंकडे १०० कोटींच्या खंडणीची मागणी केल्याचा आरोप केला होता. या प्रकरणाचा तपास करत असताना ईडीने काही दिवसांपूर्वी कोलकात्यामधील १२ कंपन्यांवर छापेमारी केली होती. या कारवाईत या बाराही कंपन्या बोगस असल्याचं समोर आलं. तपासादरम्यान १३० कोटींच्या व्यवहाराचे काही धागेदोरे हे देशमुख यांच्याशी जोडले गेल्यामुळेच त्यांच्या घरावर आज छापेमारी करण्यात आल्यची माहिती सूत्रांनी दिली आहे.