छोटा राजनला एम्समध्ये बेड मिळाला, सोशल मीडियावर नेटकऱ्यांनी व्यक्त केला संताप

सामान्य माणसांना कोरोना झाल्यावर बेड मिळत नाही मग छोटा राजनला बेड कसा मिळतो? असा प्रश्न काही नेटकरी विचारत आहेत. शिव अरूर या ट्विटर युजरनेही छोटा राजनचा फोटो शेअर करत छोटा राजन को बेड मिल गया एम्समें… असं लिहिलं आहे. या ट्विटला अनेक लोकांनी उत्तरं दिली आहेत. एक नेटकरी म्हणतो इथे सामान्य माणसांना बेड मिळत नाही, डॉनला थेट एम्समध्ये बेड? बरं झालं असतं की आपणही डॉनच असतो.

देशातली सामान्य जनता रस्त्यावर मरत असताना दहशतवाद्यांना आपण जावयांसारखं का वागवत आहोत? आपल्या देशाची बिकट याच कारणामुळे आहे कारण आपण गुंडांना सेलिब्रिटी मानतो. ‘आपल्या देशाचं दुर्दैव आहे की छोटा राजन आणि माजी पंतप्रधान मनमोहन सिंग एकाच रूग्णालयात आहेत.’ अशा प्रकारच्या प्रतिक्रिया देत लोकांनी मीम्स शेअर केले आहेत. एका नेटकऱ्याने तर हेही म्हटलं आहे की ‘पद्मभूषण पुरस्कार विजेते आणि आंतरराष्ट्रीय ख्यातीचे कलाकार राजन मिश्रा यांचा बेड न मिळाल्याने मृत्यू होतो आणि दुसरीकडे छोटा राजनचा रिपोर्ट पॉझिटिव्ह येताच त्याला एम्स रूग्णालयात बेड मिळतो. देशातल्या या परिस्थितीवर नेमकं काय म्हणावं?’

छोटा राजनवर 70 पेक्षा जास्त गुन्हे दाखल आहेत. पत्रकार जे.डे. हत्या प्रकरणात त्याला आजन्म कारावासाची शिक्षा झाली आहे. त्यानंतर त्याला तिहार तुरुंगात ठेवण्यात आलं होतं. गेल्या काही दिवसांपासून तिहार जेलमध्ये शिक्षा भोगत असलेल्या कैद्यांमध्ये कोरोनाचा संसर्ग वाढला आहे. अशात छोटा राजनलाही कोरोना झाला. त्याला बेड मिळाल्यानंतर नेटकऱ्यांनी संताप व्यक्त केला आहे.