शिवकुमार माझ्या मुलीचा खूप छळ करत होता! दीपाली चव्हाण यांच्या आईचा टाहो

दरम्यान मुलीच्या आत्महत्येची बातमी कळताच दीपाली यांच्या आई शकुंतला चव्हाण यांच्यावर दुःखाचा डोंगर कोसळला आहे. शिवकुमार यांनी माझ्या मुलीचा घात केला आहे. रात्री-बेरात्री फोन करुन हा अधिकारी माझ्या मुलीला फोन करुन दारु-मटण आणायला सांगायचा. त्याला फाशीची शिक्षा व्हायला हवी अशी मागणी दीपाली यांच्या आई शकुंतला यांनी केली आहे. आत्महत्या करण्यापूर्वी दीपालीने आपल्याला फोन केला होता आणि यावेळी ती आपल्याला शिवकुमार यांच्याकडून होत असलेल्या त्रासाबद्दल बोलत होती असंही शकुंतला म्हणाल्या.

RFO दीपाली चव्हाणांच्या मृत्यूस राज्य सरकार जबाबदार: नवनीत राणा

माझी मुलगी मला नेहमी सांगायची की माझा सगळा पगार साहेबाच्या हुजरेगिरीतच जात आहे. तुझ्या औषधाचे पैसे पण माझ्याकडे उरत नाहीत असं दीपाली मला फोनवर सांगायची. आत्महत्या करण्यापूर्वी तिने मला कॉल केला होता…मी तिला असं करु नकोस म्हणून समजावून सांगत होते, पण तिने कोणाचंही ऐकलं नाही. या गोष्टीसाठी शिवकुमार हे जबाबदार असल्याचं म्हणत त्यांना फाशीची शिक्षा व्हायला हवी अशी मागणी दीपाली चव्हाणच्या आईने केली आहे. “आजही अनेक पुरुषांना महिला सक्षम झालेल्या सहन होत नाहीत. आपला पुरुषार्थ दाखवण्यासाठी महिलांवर अशा प्रकारे अत्याचार केले जातात. अशा प्रवृत्तीच्या पुरुष अधिकाऱ्यांनीच माझ्या भाचीचा घात केला असून त्याला फाशीची शिक्षा झाली पाहीजे”, अशी मागणी दीपालीची आत्या रजनी पवारने मुंबई तक शी बोलताना दिली.

‘गर्भपात झाला तरी रजा दिली नाही’, वाचा दीपाली चव्हाणच्या पतीची संपूर्ण मुलाखत

दीपाली चव्हाण यांनी आपल्या सुसाइड नोटमध्ये नेमकं काय म्हटलंय?

‘धूळघाट गॅरेजमधून माझी बदली हरिसालला झाली होती तेव्हा मी खूप खूश होती. कारण माझ्यावर चौकशी सुरू असून देखील तुम्ही मला तुमच्याकडे घेतले होते. पण आमच्यातीलच काही कर्मचाऱ्यांनी माझे वरिष्ठ अधिकारी विनोद शिवकुमार यांचे कान भरायला सुरुवात केली व साहेब इतक्या हलक्या कानाचे आहेत की कोणत्याही गोष्टीची खातरजमा न करता मला वारंवार निलंबित करण्याची व चार्जशीट करण्याची धमकी देऊ लागले.’

‘माझ्याकडे गावांचे पुनर्वसन सुरू आहे. साहेबांनी कधी स्वतःहून गावात येऊन सभा घेतली नाही कधी क्षेत्रीय दौऱ्यासाठी गावात भेट दिली नाही. त्यांनी मला लोकांसमोर शिव्या दिल्या व पुनर्वसनमध्ये काय त्रास होत आहे याबाबत त्यांनी कधीच माझी बाजू ऐकून घेतली नाही. नेहमी नियमबाह्य कामे करण्यास भाग पाडले ते फक्त आणि फक्त मला कमी दाखवण्याचे कारण शोधत राहायचे.’

’17 मार्च 2020 रोजी मांगी येथील अतिक्रमणाबाबत त्यांनी मला फोन करून तू आत्ताच जाऊन अतिक्रमण काढ. आरोपीला ताब्यात घे, अतिक्रमण हटवताना तेथील स्थानिकांनी मला शिवीगाळ करून आम्हाला कोंडून ठेवले होते. याबाबत फोन करून व वायरलेसद्वारे सूचना देऊनसुद्धा ‘आरएफओ तुम झूट बोल रही हो नाटक कर रहे हो.’ असे ते म्हणाले. गावकरी माझ्यावर अॅट्रोसिटी दाखल करणार आहेत अशी मी त्यांना कळवले. तेव्हा ते मला म्हणाले, ‘मैं खुदही बोल के तुम्हारे उपर अॅट्रोसिटी लगाता हूं, चार महीने जेल मे रखे तो कैसे लगता है वो देखता हूं.’ असं शिवकुमार मोबाइलवरुन मला बोलले. याचं माझ्याकडे रेकॉर्डिंगसुद्धा आहे. ही रेकॉर्डिंग मी अमरावतीच्या खासदार नवनीत मॅडम यांनादेखील ऐकवली आहे.’

सोलापुरात महिला पोलीस कॉन्स्टेबलची आत्महत्या, पतीचा खळबजनक आरोप

‘ॲट्रॉसिटीमध्ये बेल न झाल्याने मी सुट्टीवर राहिले व तुम्हाला सगळ्यांना माहीत होते वेळोवेळी कोर्टाच्या निकालाबद्दल मी तुम्हाला देखील कळविले होते. पण सरांनी मला रुजू करून घेण्यास नकार दिला. तसेच माझी रजा कालावधी मधील सुट्टी ना करण्याची शिफारस केली. असे पत्र आपल्या वरिष्ठांना त्यांनी लिहिले.’ असे गंभीर आरोप दीपाली चव्हाण यांनी आपल्या सुसाइड नोटमध्ये केले आहेत.