महाराष्ट्र सरकारने पुन्हा एकदा OBC समाजाची दिशाभूल केली, भुजबळ खोटं बोलत आहेत-फडणवीस

15 महिने या सरकारने आयोग स्थापन केला नाही. त्या संदर्भातही सर्वोच्च न्यायालयाने काय म्हटलं आहे तेदेखील मी सभागृहात सांगितलं. हा ठराव मांडून केवळ वेळ मारून न्यायची आणि केंद्राकडे बोट दाखवायचं अशा प्रकारचा प्रयत्न ठाकरे सरकारने केला आहे. आम्ही ठरावाला पाठिंबा दिला, कारण ओबीसी समाजासाठी जे काही निर्णय होतील त्याला आमचा पाठिंबा आहे. पण आम्ही या मुद्द्यावरून सरकारला उघडं पाडलं. सरकार हा जो ठराव आणत आहे तेदेखील आम्ही सभागृहात पुराव्यानिशी दाखवून दिलं आहे. आम्ही बोलू नये आणि सरकारचा बुरखा आणखी फाडू नये यासाठीच सभागृहात वेगळं वातावरण निर्माण करण्याचा प्रयत्न केला जातो आहे.मात्र आज जो ठराव करण्यात आला त्यामुळे ओबीसी आरक्षणाला कोणताही फायदा होणार नाही. हे केवळ वेळकाढूपणाचं धोरण या सरकारने केलं आहे असंही फडणवीस यांनी स्पष्ट केलं. विधानसभेचं कामकाज दहा मिनिटांसाठी तहकूब करण्यात आलं तेव्हा देवेंद्र फडणवीस यांनी सभागृहाच्या बाहेर येऊन मीडियाशी संवाद साधला.

तालिका अध्यक्षांना कुठलीही धक्काबुक्की झालेली नाही. काही सदस्य आणि मंत्री जाणीवपूर्वक कामकाज सुरळीत चालू नये यादृष्टीने प्रयत्न करत आहेत. काही गोष्टी उघड केल्या जात आहेत ज्यांना काही अर्थ नाही. अधिवेशन दोन दिवसांचं, आयुधं वापरायची नाहीत अशी सगळी या अधिवेशनाची रचना आहे असंही फडणवीस यांनी म्हटलं आहे.

छगन भुजबळ यांनी खोटं सांगितलं, असत्य सांगितलं. मी सभागृहात सांगितलं आहे, इतर सभागृहांना SECC चा डेटा दिला आहे जो केंद्र सरकारने दिला आहे. मात्र तो डेटा मागितलेलाच नाही असंही फडणवीस यांनी म्हटलं आहे.