मनोरंजनाला नो ब्रेक; मराठी मालिकांचं शूटींग महाराष्ट्राबाहेर सुरु

झी मराठी चॅनेलवरील अनेक मराठी मालिकांचं शूटींग आता महाराष्ट्राबाहेर केलं जात आहे. प्रेक्षकांच्या मनोरंजनाला ब्रेक लागू नये यासाठी हे एक पाऊल उचलण्यात आलंय. यानुसार, ‘पाहिले ना मी तुला’ आणि ‘अग्गंबाई सूनबाई’ या मालिकांचं चित्रीकरण गोव्यात केलं जात आहे. ‘येऊ कशी तशी मी नांदायला’ची टीम दमणला गेली आहे.

नुकतंच ‘माझा होशील ना’ मालिकेचं शूटींग मनालीमध्ये करण्यात आलं होतं. तर आता या मालिकेचं पुढचं शूटींग सिल्व्हासाला करण्यात येत असल्याची माहिती आहे. दुसरीकडे साताऱ्यातील वाड्यात होणाऱ्या ‘देवमाणूस’ मालिकेचं शूटिंग बेळगावमध्ये होत आहे. आणि ‘चला हवा येऊ द्या’ टीमचा संपूर्ण सेट जयपूरमध्ये उभारण्यात आला असल्याची माहिती आहे.

वेध भविष्याचा कार्यक्रम सुरुच राहणार असून भगरे गुरुजी रोज सकाळी प्रेक्षकांच्या भेटीला येणार आहेत. ‘होम मिनिस्टर’चं शूटिंग आदेश बांदेकर त्यांच्या घरातूनच करणार आहेत. याशिवाय ‘रात्रीस खेळ चाले’च्या तिसऱ्या सिझनचं शूटिंग झालं असल्याने या मालिकेचे नवे भाग देखील तयार आहेत.