डबेवाल्यांना सरकारी मदत अद्यापही नाहीच, आता अपेक्षा मुंबईकरांच्या सहकार्याची…

मुंबईतले 32 वर्षांचे अरूण शिंदे यांनी कशीबशी पुढच्या तीन-चार दिवसांसाठीच्या रेशनची तरतूद केली आहे. ग्रांट रोड या स्टेशनजवळ असलेल्या डबावाला असोसिएशनमधून त्यांना हे रेशन मिळालं आहे. आता त्यांचे पुढचे तीन-चार दिवस बरे जातील. मला मुंबईकरांना पुन्हा एकदा डबे पोहचवायचे आहेत, त्यामुळे मला समाधान मिळेल. पण हे सगळं किती दिवस चालणार? असाही प्रश्न अरूण शिंदे यांनी विचारला.

अरूण शिंदे हे डबे पोहचवण्याचं काम करतात पण ते त्यांना नियमित पणे मिळत नाही. जेव्हा त्यांना डिलिव्हरीचे काम मिळते तेव्हा त्यांचे 50 किंवा 100 रूपये सुटतात. मात्र काही दिवस त्यांना काम मिळेल याची वाट बघावी लागते. मी माझ्या कुटुंबातील एकटा कमवता सदस्य हे. मला मिळालेलं काम हे घरातल्या प्रत्येकाच्या गरजेसाठी पुरत नाही. आत्ताचा काळ हा अत्यंत कठीण काळ आहे, आमचं काम लवकर सुरू झालं पाहिजे अशी अपेक्षा शिंदे यांनी व्यक्त केली आहे.

मुंबईच्या डबेवाले हे मुंबईची लाईफलाईन असलेल्या ट्रेनने प्रवास करतात आणि मुंबईकरांना डबे पुरवण्याचं काम करतात. आपल्या कामात गर्क असलेल्या मुंबईकरांना घरातल्या जेवणाची चव घेता यावी यासाठी मुंबईचे डबेवाले अपार कष्ट घेतात. त्यांच्या मॅनेजमेंटचं कौतुक ब्रिटननेही केलं आहे. मात्र गेल्यावर्षी झालेल्या लॉकडाऊननंतर अनेक जण त्यांच्या गावी परतले. राज्यात अनलॉक सुरू झाल्यानंतरही त्यातले अनेक जण गावाहून मुंबईत परत आलेच नाहीत. आताही कोरोना रूग्णांची संख्या वाढू लागली आहे त्यामुळे अनेक निर्बंध राज्यात लागू करण्यात आले आहेत. मुंबईत लोकल प्रवासाची मुभा डबेवाल्यांना नाही त्यामुळे अनेकांच्या हाताला काम नाही अशीच स्थिती आहे.

Mumbai तल्या डबेवाल्यांवर कोरोनामुळे आर्थिक संकट.. आता अपेक्षा सरकारी मदतीची

गेल्या अनेक वर्षांपासून आम्ही मुंबईत डबे पुरवण्याचं काम करतो आहे. मात्र सध्याच्या काळात आमच्या हाताला काम उरलेलं नाही. त्यामुळे आता मी मोठ्या संकटात सापडलो आहे. आम्हाला डबे पोहचवण्यासाठी आणि लोकल ट्रेनने प्रवास करण्यासाठी सरकारने मुभा दिलेली नाही. त्यामुळे आमच्या समोरच्या अडचणी आणखी वाढल्या आहेत. लॉकडाऊन आणि निर्बंध लावल्यानंतर आम्हाला सरकारने मदत करायला हवी होती. मात्र सरकारने एक रूपयाचीही मदत आजवर केलेली नाही असं डबेवाला म्हणून काम करणारे दत्तात्रय गोपाळे यांनी सांगितलं.

मागच्या कोरोना काळातून सावरत सगळ्या गोष्टी हळूहळू सुरू झाल्या होत्या. मात्र कोरोनाची दुसरी लाट फेब्रुवारीमध्ये आली. ज्यामुळे आमच्या कामावर आणि पुढच्या सगळ्या योजनांवर बोळा फिरवला गेला असं आता ते सांगत आहेत. मुंबईत पाच हजार डबेवाले आहेत. पुन्हा एकदा शहर सुरू होईल, वेग घेईल आणि आपल्या हाताला काम मिळेल अशी अपेक्षा त्यांना आहे.

प्रकाश लोटे हे डबेवाला म्हणून काम करत होते, त्यांच्या हाताला कामच उरलं नाही म्हणून त्यांनी आता ड्रायव्हिंग करायला सुरूवात केली आहे. सरकारने आम्हाला आमचं काम पुन्हा सुरू कऱण्याची परवानगी द्यायला हवी आणि लोकल प्रवासाचीही मुभा द्यायला हवी जेणेकरून आम्ही आमचं पूर्वीचं काम सुरू करू शकू आणि जगण्यासाठी काय करायचं हा प्रश्न आमच्यासमोर उरणार नाही असं प्रकाश लोटे सांगतात.

Lockdown मुळे मुंबईच्या डबेवाल्यांवर मजुरी, हमाली करण्याची वेळ

मुंबईसह राज्यात 1 मेपासून लॉकडाऊन पुन्हा वाढला त्यामुळे आता डबेवाल्यांचा विचार करून ‘खाना चाहिये’ या NGO ने त्यांना रेशन पुरवण्यास सुरुवात केली आहे. या NGO कडून 500 पिशव्या रेशन मिळतं आहे. या NGO चे रूबेन मस्करेन्हास सांगतात की आम्ही गेल्या वर्षीपासून डबेवाला असोसिएशनमधे 500 पिशव्या रेशन पुरवत होतो. यावेळी ते आम्हाला शोधत आले, आम्हाला मदत मागितली. त्यांनी आत्तापर्यंत मुंबईची, मुंबईकरांची सेवा केली आहे. त्यामुळे अशा भीषण काळात आमच्याने शक्य आहे तेवढी मदत आम्ही त्यांना करतो आहोत. त्यांच्यासाठी काहीतरी करणं हे आम्हाला आमचं कर्तव्य वाटतं.

अनेक मुंबईकरांकडे Work From Home हा पर्याय उपलब्ध आहे. मात्र डबेवाल्यांकडे हा पर्याय नाही. त्यामुळे अशा डबेवाल्यांना मदत करणं हे आम्ही आमचं कर्तव्य मानतो. कृतज्ञतेच्या भावनेतून आम्ही त्यांना मदत करतो आहोत असं रूबेन यांचे सहकारी सॅव्हिओ परेरा यांनी सांगितलं.

डबेवाला असोसिएशनचे प्रवक्ते विष्णू काळढोके म्हणतात, ‘मागच्या पंधरा महिन्यांपासून आमच्या हाताला काम नाही. आम्ही कसंतरी आमचं घर चालवत आहोत कारण अनेक लोक आमची जाणीव ठेवून आमची मदत करत आहेत.मात्र आमचं डबे पोहचवण्याचं काम हे सुरू झालं पाहिजे तरच आम्ही आमचं कुटुंब चालवू शकतो’