खासदार ओमराजे निंबाळकरांना मोठा हादरा, नेतृत्वात लढलेल्या सर्व नगरपालिका निवडणुकांमध्ये सुपडा साफ

धाराशिव जिल्ह्यात नगरपरिषद अध्यक्ष व सदस्य पदासाठी झालेल्या निवडणुकांत भाजप आणि शिंदे गटाने संघटनात्मक ताकद दाखवली. तुळजापूर, नळदुर्ग आणि मुरूम येथे भाजपने स्पष्ट बहुमत मिळवत सत्ता हस्तगत केली, तर उमरगा, कळंब आणि परंडा येथे शिवसेना शिंदे गटाने आपली सत्ता कायम राखली. विशेष म्हणजे, भूम नगरपरिषदेत बड्या राजकीय पक्षांना धक्का देत स्थानिक आघाड्यांनी बाजी मारली आहे.

तुळजापूर नगरपरिषदेत भाजपाचे विनोद गंगणे अध्यक्षपदी निवडून आले असून, येथे भाजपने 23 पैकी 18 जागांवर विजय मिळवला आहे. नळदुर्गमध्ये भाजपाचे बसवराज धरणे अध्यक्ष झाले असून, येथेही भाजप सर्वात मोठा पक्ष ठरला. मुरूम नगरपरिषदेत भाजपाचे बापुराव पाटील यांनी निर्विवाद वर्चस्व राखत अध्यक्षपद पटकावले आहे.

शिवसेना शिंदे गटाने उमरगा, कळंब आणि परंडा या नगरपरिषदांमध्ये सत्ता मिळवत आपली ताकद सिद्ध केली आहे. उमरग्यात किरण गायकवाड अध्यक्ष झाले असून, शिंदे गटाने येथे 12 जागांवर विजय मिळवला आहे. कळंब नगरपरिषदेत तिरंगी लढतीत शिवसेना शिंदे गटाच्या सौ. सुनंदा शिवाजी कापसे यांनी 2,254 मतांच्या फरकाने विजय मिळवत नगराध्यक्ष पदावर आपले नाव कोरले. परंड्यातही शिंदे गटाचे जाकीर सौदागर अध्यक्ष झाले आहेत.

भूम नगरपरिषदेत मात्र चित्र वेगळे पाहायला मिळाले. येथे आलमप्रभू भूम शहर विकास आघाडी आणि जनशक्ती नगर विकास आघाडी या स्थानिक आघाड्यांनी एकत्रितपणे राजकीय पक्षांना मागे टाकत सत्ता मिळवली. यामुळे स्थानिक प्रश्नांवर आधारित राजकारणाचे महत्त्व अधोरेखित झाले आहे.

या निकालांचा सर्वात मोठा फटका ओमराजे निंबाळकर यांना बसल्याचे स्पष्ट दिसत आहे. जिल्ह्यातील एकाही नगरपरिषदेत त्यांच्या गटाला यश मिळाले नसल्याने त्यांच्या राजकीय प्रभावावर प्रश्नचिन्ह उपस्थित झाले आहे. आगामी विधानसभा व लोकसभा निवडणुकांच्या पार्श्वभूमीवर हा निकाल महत्त्वाचा मानला जात असून, धाराशिव जिल्ह्यातील राजकीय समीकरणे बदलत असल्याचे चित्र स्पष्ट झाले आहे.

इतर महत्त्वाच्या बातम्या 

Maharashtra Nagar Parishad Election Results 2025 Winner: तुमच्या नगर परिषदेचा नगराध्यक्ष कोण, पाहा संपूर्ण निकाल