बीड : परळी तालुक्यात गांजाची शेती करणाऱ्या तीन जणांना अटक

हाळंब परिसरातील शेतात गांजाची लागवड केली जात असल्याची माहिती पोलिसांना मिळाली होती. यानंतर परळी ग्रामीण पोलीस ठाण्याच्या अधिकाऱ्यांनी सरकारी पंचांसह पाहणी केली असता त्यांना शेतात मोठ्या प्रमाणात गांजाची लागवड आढळून आली. याप्रकरणी पोलिसांनी तिघांना अटक केली असून या कारवाईमुळे परिसरात खळबळ उडाली आहे.

पोलिसांनी या कारवाईत चार शेतकऱ्यांच्या शेतात छापेमारी करत १० लाख रुपये किमतीचा दोन क्विंटल गांजा जप्त केला. शेतकऱ्यांनी तूर आणि कापसाच्या पिकात गुप्त पद्धतीने गांजाचं आंतरपीक घेतलं होतं. पोलिसांच्या या कारवाईमुळे परळी भागात मोठी खळबळ उडाली आहे.