उपमुख्यमंत्री देवेंद्र फडणवीस राज ठाकरेंच्या भेटीला, मनसेच्या आमदाराला मंत्रिपदाची लॉटरी?

महाराष्ट्राचे उपमुख्यंत्री देवेंद्र फडणवीस यांनी शिवतीर्थ या राज ठाकरेंच्या निवासस्थानी जाऊन त्यांची भेट घेतली. देवेंद्र फडणवीस हे महाराष्ट्रात घडलेल्या सत्तानाट्यानंतर पहिल्यांदाच राज ठाकरे यांच्या भेटीला गेले होते. राज्यात ३० जूनला सत्तांतर झालं. महाराष्ट्राचे मुख्यमंत्री म्हणून एकनाथ शिंदे यांनी शपथ घेतली तर देवेंद्र फडणवीस हे उपमुख्यमंत्री झाले. या राजकीय घडामोडींनंतर राज ठाकरे यांनी पत्र लिहून एकनाथ शिंदे यांचं अभिनंदन केलं होतं. तसंच देवेंद्र फडणवीस यांचीही पत्र लिहून स्तुती केली होती.

“धनुष्यातून ध्येयाचा वेध घ्यायचा तर दोरी मागे ओढावी लागते” राज ठाकरेंचं देवेंद्र फडणवीसांना पत्र

राजू पाटील (Raju Patil) यांना मंत्रिमंडळात स्थान मिळणार?

या राजकीय घडामोडी घडल्यानंतर विधानसभेत जेव्हा विशेष अधिवेशन बोलवण्यात आलं तेव्हा राज ठाकरे यांचे आभार देवेंद्र फडणवीस यांनी मानले. तसंच लवकरच आपण त्यांची भेट घेणार आहोत असंही देवेंद्र फडणवीस यांनी जाहीर केलं. त्यानुसार हे दोन नेते आज भेटले आहेत. या दोघांच्या भेटीनंतर राजकीय वर्तुळात चर्चांना उधाण आलं आहे. मनसेचे एकमेव आमदार राजू पाटील यांना मंत्रिमंडळात स्थान मिळणार की ही चर्चा जोरात सुरू आहे.

मनसेने राज्यसभेच्या निवडणुकीत तसंच विधान परिषदेच्या निवडणुकीत भाजपला पाठिंबा दिला होता. तसंच आता होणाऱ्या राष्ट्रपतीपदाच्या निवडणुकीतही एनडीएच्या उमेदवाराला म्हणजेच द्रौपदी मुर्मू यांना पाठिंबा दिला आहे. आता या सगळ्याच्या बदल्यात मंत्रिमंडळ विस्तारात मनसेला मंत्रिपद अपेक्षित आहे. मनसेचे एकमेव आमदार राजू पाटील यांना मंत्रिमंडळात स्थान मिळू शकतं. त्याबाबत या दोन नेत्यांची चर्चा झाली असावी अशी माहिती सूत्रांनी दिली आहे.

Raj Thackeray : राज ठाकरे खोटं बोलले?, छत्रपती शिवाजी महाराजांची समाधी कुणी बांधली?

जर मनसेचा आमदार मंत्रिमंडळात आला, म्हणजेच राजू पाटील यांना मंत्रिपद मिळालं तर शिवसेनेला म्हणजे उद्धव ठाकरेंच्या शिवसेनेला टार्गेट करण्यास आणखी एक चेहरा भाजपला मिळू शकतो. दरम्यान राज ठाकरेंचे सुपुत्र अमित ठाकरे यांनाही मंत्रिपद मिळू शकतं अशा चर्चा रंगल्या होत्या. मात्र राज ठाकरेंनी या बातम्यांवर विश्वास ठेवू नका असं म्हटल्याचं कळतं आहे. त्यामुळे आता जर मंत्रिपदाची लॉटरी लागलीच तर ती मनसेच्या राजू पाटील यांना लागू शकते.

एवढंच नाही तर महापालिका निवडणुकाही जाहीर होऊ शकतात. त्या निवडणुकांमध्ये काय रणनीती काय असेल यावरही या दोघांची चर्चा झाल्याचं कळतं आहे. मुंबई महापालिकेसह अनेक ठिकाणी निवडणुका होणार आहेत. त्यावेळी भाजप आणि मनसेने एकत्र लढायचं की निकालानंतर एकत्र यायचं यावरही चर्चा झाली असण्याची शक्यता आहे.

फडणवीस (Devendra Fadnavis), राज ठाकरेंची (Raj Thackeray) शिवतीर्थवरती भेट

देवेंद्र फडणवीस यांनी शिवतीर्थ या ठिकाणी जाऊन राज ठाकरे यांची भेट घेतली. तसंच त्यांच्या प्रकृतीची विचारपूस केली. राज ठाकरे यांच्या हिप बोनवर शस्त्रक्रिया झाली आहे. त्यांना तीन महिने आराम करण्याचा सल्ला डॉक्टरांनी दिला आहे. आज जेव्हा देवेंद्र फडणवीस हे शिवतीर्थ या निवासस्थानी गेले. त्यावेळी राज ठाकरे यांच्या पत्नी शर्मिला ठाकरे यांनी देवेंद्र फडणवीस यांना औक्षण केलं. उपमुख्यमंत्री झाल्याबद्दल त्यांचं अभिनंदनही केलं.