मराठा आरक्षणाच्या मागणीसाठी मुंबईतल्या आझाद मैदानावर उपोषणासाठी बसलेल्या राज्यसभा खासदार संभाजीराजे यांची मनधरणी करण्यात राज्य सरकारला यश आलं आहे. संभाजीराजेंनी उपोषण मागे घ्यावं यासाठी राज्य सरकारकडून गेल्या काही दिवसांपासून प्रयत्न सुरु होते. राज्याचे गृहमंत्री दिलीप वळसे-पाटील यांनी रविवारी संभाजीराजेंनी उपोषणस्थळी भेटही घेतली होती.
ADVERTISEMENT
यानंतर आज मुख्यमंत्र्यांच्या उपस्थितीत झालेल्या बैठकीत संभाजीराजेंच्या प्रमुख मागण्या मान्य झाल्या आहेत. यानंतर संभाजीराजेंनी आपलं उपोषण मागे घेतलं आहे.
शिवसेना नेते एकनाथ शिंदे, गृहमंत्री दिलीप वळसे-पाटील, वैद्यकीय शिक्षण मंत्री अमित देशमुख यांनी संभाजीराजेंची भेट घेतली. “मराठा समाजाच्या शिष्ठमंडळाशी आमची चर्चा झाली. प्रत्येक मुद्द्यावर आम्ही चर्चा केली. आता मागे काहीही बाकी ठेवायचं नाही असा निर्णय मुख्यमंत्र्यांनी घेतला आहे. राज्य शासनाच्या वतीने जे काही करु शकतो, ते आपण करु.” राज्य सरकार आपल्या भुमिकेशी सहमत आहे, असा विश्वास मुख्यमंत्र्यांनी संभाजीराजेंना दिल्याचं एकनाथ शिंदेंनी सांगितलं.
संभाजीराजेंनी केलेल्या मागण्या राज्य सरकारने केल्या मान्य –
-
सारथीकडून कौशल्य विकासाचे कार्यक्रम सुरु करण्यातल येतील.
-
१५ मार्चपर्यंत सारथीचं व्हिजन मांडण्यात येईल तसेच रिक्त जागाही भरल्या जातील.
-
महामंडळाला अतिरिक्त १०० कोटी रुपये निधी देण्यात येणार.
-
परदेशी शिक्षण घेणाऱ्या विद्यार्थ्यांच्या बाबतीही महत्त्वपूर्ण निर्णय घेण्यात आला आहे.
-
कर्ज रक्कम १० लाखावरुन १५ लाख करण्यात आली आहे.
-
१५ मार्चपर्यंत दोन संचालक नियुक्त करण्यात येणार.
-
कोपर्डी प्रकरणाची सुनावणी लवकरात लवकर करण्यात येणार.
-
मराठा आंदोलकांवरील गुन्हे मागे घेण्यासाठी, निर्णय घेण्यात येणार. त्या संदर्भात आढावा घेतला जाणार आहे.
-
मराठा आंदोलनात मृत पावलेल्याच्या वारसदारांना ११ जणांना नोकरी मिळली. इतरांच्या कागद पत्रांची पूर्तीता होताच त्यांनाही नोकरी देण्यात येणार.
-
सर्वोच्च न्यायालयामध्ये स्थगिती आदेशापूर्वी नियुक्त झालेल्या इएसबीसी व एसइबीसी आरक्षणाच्या माध्यमातून शासकीय सेवेत निवड झालेल्या उमेदवारांना नियुक्ती देण्यात येणार आहे.
आझाद मैदानावर संभाजीराजेंनी आपलं उपोषण मागे घेतल्याची घोषणा करताना स्टेजवर उपस्थित असलेल्या लहान मुलाच्या हातातून रस प्यायला. यानंतर त्यांनी गृहमंत्री दिलीप वळसे-पाटलांच्या हातातून रस पिऊन आपलं उपोषण संपवलं.
ADVERTISEMENT