Mumbai Weather: मुंबईकरांनो 26 जुलै आहे, थोडं सांभाळून.. हवामान खात्याने दिलाय 'हा' अलर्ट

मुंबईसाठी आज 'हा' अलर्ट

मुंबई शहर आणि उपनगरांमध्ये आज सकाळपासून आकाश प्रामुख्याने ढगाळ वातावरणासह पावसाने हजेरी लावली आहे. सकाळी आणि संध्याकाळी हलक्या ते मध्यम पावसाच्या सरी पडण्याची शक्यता आहे, तर दुपारी काही भागांत जोरदार पाऊस पडू शकतो. 

सलग बरसणाऱ्या पावसामुळे मुंबईतील अनेक सखल भागात पाणी साचण्याची शक्यता आहे, त्यामुळे प्रवासाचे नियोजन करताना सावधगिरी बाळगावी. मुसळधार पावसामुळे वाहतूक कोंडी आणि रेल्वे सेवा प्रभावित होऊ शकतात. त्यामुळे चाकरमान्यांनी पावसाचा अंदाज घेऊनच घराबाहेर पडावे. तसेच भरतीच्या वेळी समुद्रकिनारी जाणे टाळावे.

ठाणे जिल्ह्यात अनेक ठिकाणी कोसळणार मुसळधार पाऊस

ठाणे जिल्ह्यात आज सकाळी काही भागांत हलक्या सरींसह ढगाळ वातावरण आहे. दुपारी आणि संध्याकाळी पावसाचा जोर वाढण्याची शक्यता आहे. ठाणे शहर आणि आसपासच्या भागात सकाळपासूनच मुसळधार पावसाला सुरुवात झाली आहे. त्यामुळे सखल भागात पाणी साचू शकतं.

नवी मुंबईसाठी ऑरेंज अलर्ट

नवी मुंबईत सकाळी आणि संध्याकाळी हलक्या ते मध्यम पावसाच्या सरी पडण्याची शक्यता आहे. वाशी, नेरूळ आणि बेलापूरसारख्या भागात काही काळ जोरदार पाऊस पडू शकतो. येथे देखील हवामान खात्याने ऑरेंज अलर्ट जारी केला आहे.

पालघरमध्ये तुफान पावसाला सुरूवात, हवामान खात्याकडून रेड अलर्ट

पालघर जिल्ह्यात आज पावसाचा सर्वाधिक जोर राहण्याची शक्यता आहे. हवामान खात्याने रेड अलर्ट जारी केला असून, वसई, डहाणू, तलासरी आणि जव्हार परिसरात मुसळधार ते अतिमुसळधार पाऊस पडण्याचा अंदाज आहे.  पालघरमधील किनारपट्टी भागात पावसाचा जोर अधिक असेल त्यामुळे तेथील नागरिकांनी सतर्क राहावं. तसंच पर्यटकांनी आणि मच्छिमारांनी समुद्र किनारी किंवा समुद्रात न जाणारा इशाराही हवामान खात्याने दिला आहे. 

भरती-ओहोटी: मुंबई आणि पालघरमध्ये आज भरतीच्या वेळी समुद्रकिनारी जाणे टाळावे, कारण उंच लाटांचा धोका आहे.