सलीम कुत्ता प्रकरणी चर्चेत ते फडणवीसांशी भेट... ठाकरेंच्या शिवसेनेतून हकालपट्टी झाली, सुधाकर बडगुजर कोण?

हे ही वाचा >> वैष्णवीनंतर आशाराणीनेही स्वत:ला संपवलं! सोलापुरातील संतापजनक घटना, मुलीचे वडील म्हणाले...

सुधाकर बडगुजर यांनी परवा मुख्यमंत्री देवेंद्र फडणवीस यांची भेट घेतली होती. या भेटीनंतर त्यांच्याबद्दल वेगवेगळ्या चर्चांना जोर आला होता. या पार्श्वभूमीवर शिवसेनेने तातडीने कारवाई करत बडगुजर यांना पक्षातून काढून टाकले. या हकालपट्टीमुळे नाशिकच्या राजकीय वर्तुळात खळबळ उडाली आहे.

कोण आहेत सुधाकर बडगुजर?

सुधाकर बडगुजर हे शिवसेना उद्धव बाळासाहेब ठाकरे पक्षाचे नाशिक येथील प्रमुख नेते होते. ते नाशिक जिल्ह्याचे शिवसेना जिल्हाप्रमुख होते. तसंच नाशिक पश्चिम विधानसभा मतदारसंघाचे माजी आमदार आहेत. त्यांचं राजकीय वजन आणि स्थानिक पातळीवरील प्रभाव यामुळे ते सातत्याने चर्चेत राहतात. मात्र, त्यांच्याशी संबंधित काही वादग्रस्त प्रकरणांमुळेही ते गेल्या काही वर्षांत प्रकाशझोतात आले आहेत.

2024 विधानसभा निवडणूक

सुधाकर बडगुजर यांना शिवसेना (उबाठा) पक्षाने नाशिक पश्चिम मतदारसंघातून उमेदवारी दिली होती. निवडणुकीदरम्यान त्यांनी प्रचारात सक्रिय सहभाग घेतला, पण काही कार्यकर्त्यांना प्रचारापासून रोखण्याचा प्रयत्न झाल्याचा आरोप त्यांनी केला होता. तसंच, निवडणुकीनंतर मतमोजणीबाबत त्यांनी निवडणूक आयोगाकडे पुनर्मोजणीची मागणी केली होती. 

सलीम कुत्ता प्रकरण

2023 मध्ये सुधाकर बडगुजर यांच्यावर गंभीर आरोप झाले होते. त्यांचे कथितरित्या 1993 च्या मुंबई बॉम्बस्फोटातील आरोपी सलीम कुट्टा यांच्यासोबत पार्टी करतानाचे फोटो आणि व्हिडिओ समोर आले होते. या प्रकरणामुळे मोठा वाद निर्माण झाला. विरोधी पक्षांनी त्यांच्यावर टीका केली होती. यासंदर्भात त्यांनी कागदपत्रे सादर करत आपली बाजू मांडली आणि कागदपत्रे खोटी असल्यास जाहीरपणे आत्महत्या करेन, असं विधान केलं. या प्रकरणात त्यांना अटकपूर्व जामीन मिळाला होता.

अंडरवर्ल्डशी संबंधांचे आरोप

काही एक्स पोस्ट्समध्ये बडगुजर यांच्यावर अंडरवर्ल्डशी संबंध असल्याचा आरोप करण्यात आला. त्यांच्या मुलावरही मोक्का अंतर्गत कारवाई झाल्याचा उल्लेख आहे. या आरोपांमुळे त्यांची प्रतिमा वादग्रस्त झाली होती. पण बडगुजर यांनी हे आरोप खोडून काढण्याचा प्रयत्न केला आहे.