पवारांनी कितीवेळा रंग बदललेत?; भाजपचं इतिहासाचे दाखले देत प्रत्युत्तर

राज ठाकरे यांनी मनसेच्या मेळाव्यात मशिदींवरील भोंग्यांचा मुद्दा उपस्थित केला होता. त्याचबरोबर हिंदूत्वाच्या मुद्द्यावरही त्यांनी भाष्य केलं. राज ठाकरे यांच्या पूर्वीच्या भूमिकेत आणि आताच्या भूमिकेत प्रचंड बदल झाला असल्याचं सांगत ते भाजपची बी टीम बनल्याची टीका राष्ट्रवादीच्या नेत्यांकडून होत आहे. या राजकीय वादात आता भाजपनेही उडी घेतलेली असून, भाजपचे राज्याचे मुख्य प्रवक्ते केशव उपाध्ये यांनी थेट शरद पवारांवरच नेम धरला.

केशव उपाध्ये यांनी ट्विट करत राष्ट्रवादीला सवाल केला आहे. त्यांनी शरद पवारांच्या इतिहासातील वेगवेगळ्या निर्णयांचे दाखलेही दिले आहेत.

“….रंग बदलणारा सरडा वैगेरे ठीक आहे, पण शरद पवार यांचं काय? १९७८ मध्ये वसंतदादांच्या पाठीत खंजीर खुपसून पुलोदचं सरकार स्थापन करत राज्याचे मुख्यमंत्री बनले. त्यानंतर समाजवादी काँग्रेस पक्ष स्थापन केला. पुन्हा १९८६ मध्ये समाजवादी काँग्रेसमध्ये विलीन करण्यात आली. पुन्हा १९९९ मध्ये काँग्रेसमध्ये सोनिया गांधींच्या परदेशी नागरिकत्वाच्या मुद्दयावरून काँग्रेसमधून बाहेर पडत राष्ट्रवादीची स्थापना केली. पुन्हा सत्तेसाठी काँग्रेसच्या जवळ गेले. सरकारमध्ये मंत्रिपदे घेतली.”