‘आपल्याला कुणीही रोखू शकत नाही’; मुसळधार पावसात राहुल गांधींचं भाषण, व्हिडीओ व्हायरल

राहुल गांधी यांच्या नेतृत्वाखालील भारत जोडो यात्रा सध्या भाजपशासित कर्नाटकात आहे. भारत जोडो यात्रेचा कर्नाटकातला हा तिसरा दिवस आहे. यात्रेदरम्यान राहुल गांधी यांनी नंजनगुडमधल्या प्रसिद्ध प्राचीन श्रीकांतेश्वर स्वामी मंदिरात जाऊन दर्शन घेतलं.

त्यानंतर राहुल गांधींनी मैसूरमधील एपीएमसी मैदानावर एका सभेला संबोधित केलं. राहुल गांधी यांचं भाषण सुरू असतानाच मुसळधार पावसाला सुरूवात झाली. पाऊस कोसळत असताना राहुल गांधींनी आपलं भाषण सुरूच ठेवलं.

राहुल गांधी यांच्या पावसातल्या या सभेचा व्हिडीओ आता सोशल मीडियावर प्रचंड व्हायरल झाला आहे. काँग्रेसच्या कार्यकर्त्यांबरोबरच इतरांकडूनही हा व्हिडीओ शेअर केला जात आहे.

भारत को एकजुट करने से,
हमें कोई नहीं रोक सकता।

भारत की आवाज़ उठाने से,
हमें कोई नहीं रोक सकता।

कन्याकुमारी से कश्मीर तक जाएगी, भारत जोड़ो यात्रा को कोई नहीं रोक सकता। pic.twitter.com/sj80bLsHbF

— Rahul Gandhi (@RahulGandhi) October 2, 2022

राहुल गांधींची भारत जोडो यात्रा कर्नाटकात, भाजप-आरएसएसवर टीकास्त्र

भरपावसात झालेल्या या सभेत काँग्रेस नेते राहुल गांधींनी सत्ताधारी भाजप आणि राष्ट्रीय स्वयंसेवक संघावर टीकास्त्र डागलं. राहुल गांधी म्हणाले, “भारत जोडो यात्रा कर्नाटकात पोहोचलीये. नदीप्रमाणे ही यात्रा कन्याकुमारीपासून कश्मीरपर्यंत चालेल. या नदीत तुम्हाला हिंसा, द्वेष दिसणार नाही. फक्त प्रेम दिसेल आणि बंधूभाव दिसेल. ही यात्रा थांबणार नाही. आता बघा पाऊस येतोय. पावसालाही यात्रा रोखता आलेली नाहीये. भाजप-आरएसएसने जो द्वेष देशात भरला आहे, त्याविरोधात ही यात्रा आहे”, असं राहुल गांधी म्हणाले.

शरद पवारांच्या साताऱ्यातल्या सभेची चर्चा

राहुल गांधी यांच्या कर्नाटकातल्या पावसातल्या सभेचा व्हिडीओ व्हायरल झाल्यानंतर राष्ट्रवादी काँग्रेसचे अध्यक्ष शरद पवार यांच्या साताऱ्यातल्या सभेची चर्चा सुरू पुन्हा सुरू झालीये. २०१९ च्या विधानसभा निवडणुकीत शरद पवारांच्या साताऱ्यातल्या पावसातील सभेनं निवडणुकीचं चित्रच बदललं होतं. या सभेमुळे राष्ट्रवादी काँग्रेसला विधानसभा निवडणुकीत आणि सातारा लोकसभा मतदारसंघात यश मिळालं होतं. राहुल गांधी यांच्या सभेची तुलना आता सभेशी होऊ लागली आहे.