शरद पवारांच्या घरावरील हल्ल्यानंतर देवेंद्र फडणवीसांची प्रतिक्रिया..

देवेंद्र फडणवीस यांनी घडल्या प्रकाराबाबत प्रचंड नाराजी व्यक्त केली आहे. ‘ज्येष्ठ नेते शरद पवार साहेब यांच्या निवासस्थानी झालेली घटना सर्वथा चुकीची आहे.’ अशी प्रतिक्रिया देवेंद्र फडणवीस यांनी आपल्या अधिकृत ट्विटर अकाउंटवरुन दिली आहे.

शरद पवारांच्या घरावरील हल्ल्यानंतर देवेंद्र फडणवीस नेमकं काय म्हणाले?

‘ज्येष्ठ नेते शरद पवार साहेब यांच्या निवासस्थानी झालेली घटना सर्वथा चुकीची आहे. नेते कुठल्याही पक्षाचे असोत, घरांवर अशी आंदोलने अजीबात समर्थनीय नाहीत. मी या घटनेचा तीव्र निषेध करतो.’

‘गेल्या 5 महिन्यांहून अधिक काळपासून एसटी कर्मचारी आंदोलन करीत आहेत. त्यांच्या व्यथा, मागण्या योग्यप्रकारे व योग्य व्यासपीठावरच मांडल्या जाव्यात आणि त्या ऐकून घेतल्या जाव्या, अशी अपेक्षाही या निमित्ताने व्यक्त करतो.’

ज्येष्ठ नेते शरद पवार साहेब यांच्या निवासस्थानी झालेली घटना सर्वथा चुकीची आहे. नेते कुठल्याही पक्षाचे असोत, घरांवर अशी आंदोलने अजीबात समर्थनीय नाहीत. मी या घटनेचा तीव्र निषेध करतो. @PawarSpeaks

— Devendra Fadnavis (@Dev_Fadnavis) April 8, 2022

एसटी कर्मचाऱ्यांच्या आंदोलनाची धग ‘सिल्व्हर ओक’पर्यंत; शरद पवारांनी मांडली भूमिका

शरद पवारांच्या घराबाहेर काय घडलं?

मागील पाच महिन्यांपासून संपावर असलेल्या एसटी कर्मचाऱ्यांनी मुंबई उच्च न्यायालयाने दिलेल्या निर्णयानंतर आज थेट शरद पवार यांच्या घरावर धडक दिली. मुंबई उच्च न्यायालयाने कर्मचाऱ्यांना 22 एप्रिलपर्यंत हजर कामावर हजर होण्यास सांगितलं होतं. त्याचबरोबर दिलेल्या मुदतीत कामावर रुजू होणाऱ्या कर्मचाऱ्यांना कारवाईपासून संरक्षण देण्याचे आदेश न्यायालयाने दिलेले आहेत.

दरम्यान, आज (8 एप्रिल) दुपारी एसटी कर्मचाऱ्यांनी अचानक शरद पवार यांचं मुंबईतील निवासस्थान असलेल्या सिल्व्हर ओक बाहेर आंदोलन सुरू केलं. एसटी महामंडळाचं शासनात विलीनीकरण करण्याच्या मागणीवर जोर देत निदर्शनं सुरू केलं. या दरम्यान काही आंदोलकांनी चप्पलफेक केल्याचाही प्रकार घडला. त्यानंतर आंदोलक आक्रमक झाल्याचं दिसून आलं.

आंदोलन सुरू असताना खासदार सुप्रिया सुळे यांनी आंदोलकांना शांत करण्याचा प्रयत्न केला. “शांततेत बोलणार असाल, तर मी ऐकून घ्यायला तयार आहे. मी हात जोडून विनंती करते की, शांत बसा. मी ऐकून घ्यायला तयार आहे. याक्षणी मी चर्चा करायला तयार असून, शांततापूर्ण मार्गाने बोलूया,” असं आवाहन सुप्रिया सुळे यांनी आंदोलकांना यावेळी केलं होतं.