नौदल अधिकारी सुरजकुमार दुबे यांच्या मृत्यूला आता नवं वळण मिळालंय. पोलिसांनी केलेल्या तपासात मिळालेल्या माहितीनुसार, सुरजकुमार दुबे यांच्याकडे 3 मोबाईल नंबर होते. ज्यातील केवळ 2 नंबरबाबत त्यांच्या घरच्यांना माहिती होती. 1 फेब्रुवारीला दुबेंचा चुलत भाऊ चंदन कुमार याच्याशी तिसऱ्या नंबरवरून संपर्क झाला होता. त्यानंतर हा तिसरा नंबर वापरत असलेला फोन बंद करण्यात आला.
पालघर पोलिसांनी नौदल अधिकारी सुरजकुमार दुबेंच्या बँक खात्यांचाही तपास केला. यामध्ये दुबेंनी भोपाळमधील आस्था आणि मुंबईतील एंजल या शेअर ब्रोकिंग कंपनीसोबतही याच नंबरवरून काही व्यवहार केल्याचं समोर आलंय. दुबेंचं सॅलरी अकाऊंट मुंबईतल्या कोलाब्यातील स्टेट बँक ऑफ इंडियामध्ये आहे. या खात्यावरून दुबेंनी 8 लाखांचं कर्ज काढलेलं. या खात्यात आता केवळ 302 रूपये उरलेत.
याशिवाय दुबेंचं एसबीआयमध्येच आणखी एक अकाउंट होतं. ज्यामध्ये 5 हजार रूपये होते, पण ते ही 1 फेब्रुवारीला चेन्नईतून काढण्यात आलेले. या दोन्ही अकाऊंटवरून अनेक कर्ज काढण्यात आल्याचं पोलिसांच्या लक्षात आलं.
सुरजकुमार यांनी आपल्या नौदलातील एका सहकाऱ्याकडूनही 6 लाख घेतले होते, ज्याची परतफेड करण्याबाबत तो सहकारी गेल्या अनेक दिवसांपासून सुरजकुमार यांना सांगत होता.
15 जानेवारीला दुबे यांचा साखरपुडा झाला. त्यावेळी सुरजकुमार यांच्या सासरच्यांनी त्यांना 9 लाख रूपये वेगवेगळ्या माध्यमातून दिलेले.
या सगळ्यांचे धागेदोरे पकडत आता पालघर पोलिस याप्रकरणी तपास करत आहे. एकूण 10 टीम तयार करण्यात आया असून चेन्नईलाही टीम गेलेली आहे.
चेन्नईला ट्रेनिंगला गेलेल्या सुरजकुमार दुबे यांचं अपहरण करून त्यांना पालघरमध्ये जिवंत जाळण्यात आलेलं. उपचारादरम्यान त्यांचा मृत्यू झालेला.
भारतीय नौदल अधिकारी सुरजकुमार मिथिलेश दुबे यांना पालघरमध्ये जिवंत जाळून मारण्यात आलंय. 25 वर्षीय सुरजकुमार हे मूळचे झारखंडचे….ट्रेनिंगनिमित्त ते तामिळनाडूच्या कोईम्बतूरमध्ये गेलेले.
30 जानेवारीला जेव्हा ते तामिळनाडूहून निघत होते, तेव्हा चेन्नई विमानतळावर तिघांनी बंदुकीचा धाक दाखवून त्यांच्याकडचे पैसे आणि मोबाईल लुटले, शिवाय 10 लाखांची मागणीही केली. यानंतर सुरजकुमार यांना अज्ञात स्थळी 3 दिवसांसाठी डांबून ठेवलं. सुरजकुमार यांच्याकडून 10 लाख मिळणार नाही, असं कळताच 5 फेब्रुवारीला अज्ञातांनी सुरजकुमार यांना पालघरच्या तलासरी तालुक्यातील वेवजी गावात आणलं.
पालघरमध्ये आणल्यानंतर शुक्रवारी घोलवड जवळील जंगलात सुरजकुमार यांचे हात-पाय बांधण्यात आले, आणि त्यांच्यावर पेट्रोल ओतून त्यांना जिवंत जाळलं. यात सुरजकुमार 90 टक्के भाजले. त्यांच्या किंकाळ्या ऐकून गावकऱ्यांनी पोलिसांना माहिती दिली. घोलवड पोलिसांनी डहाणूच्या जिल्हा रुग्णालयात सुरजकुमार यांना दाखल केलं. पण त्यांची तब्येत इतकी नाजूक होती, की डॉक्टरांनी त्यांना मुंबईला नेण्याचा सल्ला दिला. मात्र उपचारादरम्यान सुरजकुमार यांचा मृत्यू झाला
