Personal Finance: स्टॅम्प ड्युटी भरली तर तुम्हालाही मिळू शकतो Tax Benefit, पण नेमकं कसं?

आयकर कायद्यानुसार, स्टॅम्प ड्युटीवरील कर सूट वैयक्तिक मालक, सह-मालक किंवा हिंदू अविभाजित कुटुंबांना मिळू शकते. संयुक्त मालकीच्या बाबतीत, सह-मालकांना त्यांच्या हिश्श्यानुसार सूट दिली जाते. यासाठी, मालमत्ता सर्व मालकांच्या नावावर नोंदणीकृत असणे अनिवार्य आहे आणि मुद्रांक शुल्क त्यांच्याकडून भरले जाणे गरजेचे आहे. जर मालमत्तेच्या सह-मालकांव्यतिरिक्त कोणी दुसऱ्याने मुद्रांक शुल्क भरले तर मालमत्तेच्या सह-मालकांना कर कपातीचा लाभ मिळणार नाही.

फक्त निवासी मालमत्तेवर सूट

भारतीय आयकर कायदा, 1961 च्या कलम 80C (xviii) (d) मध्ये मालमत्ता खरेदी किंवा हस्तांतरण करताना मुद्रांक शुल्क आणि नोंदणी शुल्क यासारख्या खर्चांवर कर सूट देण्याची तरतूद आहे. या अंतर्गत, 1.5 लाख रुपयांपर्यंतची वजावटीचा दावा करता येतो. 

येथे हे लक्षात घेण्यासारखे आहे की, ही सूट केवळ निवासी मालमत्तेवरच मिळू शकते, व्यावसायिक मालमत्तेवर नाही.

ताबा आवश्यक आहे

निवासी मालमत्तेसाठी भरलेल्या स्टॅम्प ड्युटीवर कर सवलत मिळविण्यासाठी, तुमच्याकडे मालमत्तेचा ताबा असणे आवश्यक आहे. बांधकाम सुरू असलेल्या मालमत्ता स्टॅम्प ड्युटी कर लाभांसाठी पात्र नाहीत.

5 वर्षांचा लॉक-इन कालावधी

ज्या मालमत्तेसाठी स्टॅम्प ड्युटीवर कर लाभ मिळाला आहे ती मालमत्ता पाच वर्षांसाठी विकता येणार नाही. जर कोणी या कालावधीपूर्वी मालमत्ता विकली तर ज्या वर्षी सूट मिळाली त्या वर्षाचा आयटीआर सुधारित केला जातो आणि स्टॅम्प ड्युटी कपातीवर कर आकारला जातो.

ही अट देखील लागू

स्टॅम्प ड्युटीवरील कर कपातीसाठी, तुम्ही कलम 80 C अंतर्गत 1.5 लाख रुपयांची कमाल सूट मर्यादा ओलांडलेली नसणे देखील आवश्यक आहे. याचा अर्थ असा की जर तुम्ही आधीच ईपीएफ, पीपीएफ, एससीएसएस, जीवन विमा पॉलिसी, ईएलएसएस इत्यादी गुंतवणुकीवर 1.5 लाख रुपयांपर्यंत सूट घेतली असेल, तर तुम्ही स्टॅम्प ड्युटीवर कर सवलतीचा दावा करू शकत नाही.