कोकणात सहलीला गेलेल्या विद्यार्थ्यांची बस 20 फुट खाली कोसळली, बसचा अक्षरश: चुराडा; चौघांची प्रकृती गंभीर

मिळालेल्या माहितीनुसार, पिंपळगाव (जि. नाशिक) येथील विद्यार्थ्यांची सहल कोकणात निघाली होती. सहल संपल्यानंतर बस रात्री उशिरा नाशिककडे प्रयाणासाठी निघाली. पहाटेच्या सुमारास बस वाठार परिसरात पोहोचली असता चालकाचा रस्त्याचा अंदाज चुकला. महामार्गावर सुरू असलेल्या कामामुळे रस्त्याच्या कडेला मोठी खोल दरीसारखी जागा निर्माण झाली होती. चालकाला ती जागा दिसली नाही आणि बस थेट त्या दिशेला घसरत दरीत कोसळली.

हेही वाचा : मालवणमध्ये भाजप पदाधिकाऱ्याच्या गाडीत घबाड सापडलं, निलेश राणेंनी थेट पोलीस स्टेशन गाठलं

अचानक झालेल्या धडकेने बसमधील विद्यार्थ्यांमध्ये एकच गोंधळ उडाला. बस कोसळल्यानंतर क्षणभर विद्यार्थ्यांना काय घडले ते समजायलाच वेळ लागला. सुदैवाने बस उलटली नाही, त्यामुळे मोठा अनर्थ टळल्याचे प्राथमिक तपासातून समोर आले आहे. मात्र धक्क्याची तीव्रता इतकी होती की बसच्या पुढील भागाचा पूर्णपणे चुराडा झालाय.

घटनास्थळी स्थानिक नागरिकांनी धाव घेऊन बचावकार्य सुरू केले. त्यानंतर महामार्ग पोलीस पथकाने घटनास्थळी दाखल होऊन सर्व जखमी विद्यार्थ्यांना बाहेर काढण्याचे काम गतीने सुरू केले. जखमींना तातडीने कराड उपजिल्हा रुग्णालयात हलवण्यात आले तर काही विद्यार्थ्यांना अधिक उपचारांसाठी कृष्णा हॉस्पिटलमध्ये दाखल करण्यात आले आहे.

चार विद्यार्थ्यांची प्रकृती गंभीर असल्याचे डॉक्टरांनी सांगितले असून त्यांच्यावर विशेष उपचार सुरू आहेत. बस कशी कोसळली? चालक झोपला होता का? की रस्त्यावरील सुरू असलेल्या कामामुळे दृश्य अस्पष्ट झाले होते? याबाबतचा तपास सुरू असल्याचे पोलिसांनी सांगितले. या अपघातामुळे वाठार परिसरात एकच खळबळ उडाली असून पालकांची मोठी गर्दी रुग्णालयात झाली आहे. विद्यार्थ्यांची प्रकृती स्थिर करण्यासाठी वैद्यकीय पथक युद्धपातळीवर काम करत आहे.

इतर महत्त्वाच्या बातम्या 

बीड : नगरपालिका निवडणुकीत पैशांचा पाऊस, स्कुटीच्या डिक्कीत वाटपासाठी तगडी रक्कम ठेवली; पाहा व्हिडीओ