10×12 ची रुम, आतमध्ये 50 विषारी नाग, सापाकडून चावून घेण्यासाठी 50 हजारांचा रेट, नेमकं प्रकरण काय?

अधिकची माहिती अशी की, या प्राण्यांचा वापर केवळ तस्करीसाठीच नाही, तर त्यांचे विष काढून हाय-प्रोफाईल रेव पार्ट्यांमध्ये नशेचा पुरवठा करण्यासाठी केला जात होता. या प्रकरणी पोलिसांनी मणिकनंदन नादर नावाच्या 41 वर्षीय मुख्य आरोपीला अटक केली असून, त्याच्या ताब्यातून जप्त करण्यात आलेल्या प्राण्यांची आंतरराष्ट्रीय बाजारात मोठी किंमत असल्याचे सांगण्यात येत आहे.

या तपासादरम्यान धक्कादायक माहिती समोर आली असून हे रॅकेट सापांच्या विषाचा मोठा सौदागर असल्याचे स्पष्ट झाले आहे. अहमदाबाद, गांधीनगर आणि खेडा परिसरातील गुप्त रेव पार्ट्यांमध्ये या विषाला मोठी मागणी होती, जिथे एका डोससाठी तब्बल 50 हजार रुपयांपर्यंतची रक्कम वसूल केली जात असे. नशेसाठी शौकीन लोक सापांकडून स्वतःला चावून घेत किंवा विषाचे काही थेंब थेट शरीरात टोचून घेत असत. विशेष म्हणजे, वेगवेगळ्या प्रजातीच्या सापांकडून दंश करून घेण्यासाठी वेगवेगळे दर निश्चित करण्यात आले होते. या कारवाईत 50 विषारी सापांसह लाल हाताचे टॅमरिन माकड, आफ्रिकन ग्रे पोपट, निळे-सोनेरी मॅकॅओ पोपट, पर्शियन मांजरी आणि नेदरलँडचे बुटके ससे असे दुर्मिळ प्राणी जप्त करण्यात आले आहेत.

हेही वाचा : प्रेयसी म्हणाली, 'तुला खोट्या प्रकरणात अडकवेन, 10 लाख रुपये दे..' पुरुषानं विष पिऊन उचललं टोकाचं पाऊल

तपास यंत्रणांना संशय आहे की हे एक संघटित आंतरराज्यीय रॅकेट असून त्याचे धागेदोरे चेन्नई आणि इतर महत्त्वाच्या बंदरांशी जोडलेले आहेत. हे प्राणी सीमा शुल्क चुकवून बेकायदेशीर मार्गाने भारतात आणले गेले असावेत, अशी शक्यता वर्तवण्यात येत आहे. सूत्रांच्या माहितीनुसार, यातील काही सापांची विक्री औषध निर्माण कंपन्यांना देखील बेकायदेशीरपणे करण्यात आली होती, तर उर्वरित विष ड्रग्ज सिंडिकेटला पुरवले जात होते. या रॅकेटचे जाळे केवळ गुजरातपुरते मर्यादित नसून त्याचे कनेक्शन मोठ्या फार्मा कंपन्यांपर्यंत पोहोचले असल्याने पोलीस आता या प्रकरणाचा सखोल तपास करत आहेत.

प्रकरणाचे गांभीर्य लक्षात घेता वन विभाग, सीमा शुल्क विभाग आणि सायबर सेल यांसारख्या अनेक यंत्रणांनी या तपासात उडी घेतली आहे. वन विभाग वन्यजीव संरक्षण कायद्याच्या उल्लंघनाची चौकशी करत आहे, तर सीमा शुल्क विभाग विदेशी प्राण्यांच्या तस्करीच्या मार्गांचा शोध घेत आहे. दुसरीकडे, अहमदाबाद महानगरपालिका दाट लोकवस्तीच्या भागात अशा प्राण्यांमुळे पसरणाऱ्या संभाव्य आजारांच्या धोक्याचे आकलन करत आहे. सायबर सेलकडून आरोपीचे डिजिटल रेकॉर्ड आणि बँक व्यवहार तपासले जात असून, त्याद्वारे त्यांच्या ग्राहकांची मोठी यादी हाती लागण्याची शक्यता वर्तवली जात आहे.

इतर महत्त्वाच्या बातम्या 

प्रेयसी म्हणाली, 'तुला खोट्या प्रकरणात अडकवेन, 10 लाख रुपये दे..' पुरुषानं विष पिऊन उचललं टोकाचं पाऊल