रामराजे नाईक निंबाळकरांना तगडा झटका, नगराध्यक्षपदाच्या निवडणुकीत मुलाचा पराभव; फलटणमध्ये काय घडलं?

संपूर्ण सातारा जिल्ह्याचे लक्ष लागून राहिलेल्या या निवडणुकीत अत्यंत अटीतटीची लढत पाहायला मिळाली. भाजप आणि राष्ट्रवादी काँग्रेस (अजित पवार गट) युतीकडून समशेरसिंह नाईक निंबाळकर मैदानात होते, तर शिवसेना (शिंदे गट) कडून अनिकेत राजे निंबाळकर यांना उमेदवारी देण्यात आली होती. दोन्ही बाजूंनी जोरदार प्रचार करण्यात आला होता. मुख्यमंत्री देवेंद्र फडणवीस यांनी भाजप उमेदवारासाठी सभा घेतली, तर उपमुख्यमंत्री एकनाथ शिंदे यांनी शिवसेना उमेदवारासाठी प्रचार केला. त्यामुळे ही निवडणूक प्रतिष्ठेची बनली होती.

अखेर मतमोजणीत भाजपने बाजी मारत नगराध्यक्षपदावर आपला दावा सिद्ध केला. समशेरसिंह नाईक निंबाळकर यांच्या विजयामुळे भाजप–राष्ट्रवादी युतीला मोठे यश मिळाले असून माजी खासदार रणजितसिंह नाईक निंबाळकर हे या विजयाचे शिल्पकार ठरल्याची चर्चा राजकीय वर्तुळात आहे. त्यांच्या रणनीतीमुळे आणि संघटनात्मक ताकदीमुळे भाजपला फलटणमध्ये निर्णायक यश मिळाल्याचे मानले जात आहे.

नगरपरिषदेच्या एकूण 27 जागांपैकी 16 जागांवर भाजपने विजय मिळवत स्पष्ट बहुमत प्राप्त केले आहे. त्यामुळे फलटण नगरपरिषदेत सत्तांतर निश्चित झाले आहे. गेल्या अनेक वर्षांपासून प्रभाव असलेल्या रामराजे नाईक निंबाळकर गटाला हा मोठा धक्का मानला जात आहे. विशेषतः नगराध्यक्षपदाच्या निवडणुकीत थेट पराभव झाल्याने त्यांच्या गटाची राजकीय ताकद कमी झाल्याचे चित्र स्पष्ट झाले आहे.

या निकालानंतर फलटणच्या राजकारणात नवे समीकरण तयार होणार असल्याची चिन्हे आहेत. भाजपच्या विजयामुळे स्थानिक पातळीवर पक्षाचे बळ वाढले असून आगामी काळात नगरपरिषद कारभारावर भाजपची छाप राहणार आहे. दुसरीकडे, शिवसेना (शिंदे गट) आणि रामराजे नाईक निंबाळकर गटाला आत्मपरीक्षण करण्याची वेळ आली आहे.

एकूणच फलटण नगरपरिषद निवडणूक ही केवळ स्थानिक स्वराज्य संस्थेची निवडणूक न राहता, ती राज्यस्तरीय नेत्यांच्या प्रतिष्ठेची लढाई ठरली होती. त्या लढाईत भाजपचे समशेरसिंह नाईक निंबाळकर विजयी ठरले असून रामराजे नाईक निंबाळकर यांना मोठा राजकीय धक्का बसल्याचे चित्र आहे.

इतर महत्त्वाच्या बातम्या 

तुळजापूर ड्रग्स प्रकरणातील आरोपीला उमेदवारी दिल्याने टीका झाली, पण त्याच विनोद गंगणे यांनी मिळवला विजय